Abraham Mwanyekange
Omushiki weengalo Shoopala Immanuel, la shiivika nawa meengalo Podoski wokomukunda Oshaala moshikandjohoololo Onesi, mOmusati okwa ti okwa pandula Ovashaala molwaasho ovo va dimbulula oshitalenti shaye shokwiimba eengalo nokudja opo ina shuna vali monima.
Podoski okwa ti nonande a kala ta shiki eengalo okwa kufa yo ombinga moinyangadalwa hai ningwa peefikola efimbo eli menongelo ngaashi, okutondoka naikwao ihapu.
“Manga ndi li kOshaala onda tameka nale okutota po oikwelengi yange yeengalo, handi denge ashike koitaafula pamwe novanafikola vakwetu,” ta ti. Podoski okwa ti eshi a mana osekundofikola yaye kOnesi okwa ka twikila elihongo laye koMarco Mpollo VTC, ko oko nee a ka monena omhito okushakeneka omanyakwa meengalo, ngaashi oonakufya Danger Mandala Geepafu naDj Soso. Okwa shakeneka yo vamwepo ngaashi Rito Ekwambi laCleo, Mr World navakwao vahapu ndele tava pange oukaume uwa. Konima yelihongo laye ko-VTC okwa pitifa oalbuma yaye yotete yedina “Calient” li li moshiputu tali ti oinima iwa.
Podoski okwa ti eengalo odemweetela opo atamekepo o brand yaye tayuufanwa “I swear and I care mo2022. Podoski okwa ti kakele komusiki oku na oshinakuwanifa shokuhunga ovanhu omwenyo, osho he shi ningi oshali shaMuhongi.
“Inamu kala momaupyakadi, popyeni naame ndi mu pe omayele opo mu findane mwaaishe mwa taalela,” ta ti. Podoski okwa indila opo ovashikingalo Ovanamibia va longele kumwe opo va twale omusiki kondje yoshilongo. Eengalo daPodosik otadimonika komalungula aeshe oko haku tulwa eengalo.