ONGWEDIVA – Oilyo ine yongeleka yaElcin, mwa kwatelwa ovafitaongalo, oya twala eindilo layo komhangu opo ongerki yaElcin iha valule omahoololo ovabiisofi ovo va nangekwa Osoondaha ya dja ko.

Omahoololo ovabiisofi aa okwa li a ningwa omudo 2021 nomudo 2024. Omukanda wopaveta wa shainwa komukalilupo wopaveta Samuel Edegeware wehangano loShikongo Law Chambers oo wa yandjwa komhangu yopombada, otau ti ovaningi veindilo eli otava ka ya komhangu ngeenge ovo va pulwa va nyamukule ile va kaleke oshidjemo shomahoololo oo ova kala inava nyamukula moule womafiku 14. Oonakunyamukula ovo ovabiisofi va nangekwa Osoondaxa, Gideon Niitenge koshikandjongerki shokouninginino noshoyo Hilja Nghaangulwa koshikandjongerki shokushilo ongovatamanekwa moshibofa osho.

Nghaangulwa oye omukainhu wotete okuninga Omubiisofi waElcin. Momukanda ou omwa shangwa yoo vali omadina ovabiisofi ve li moshipundi shopendjela Veikko Munyika naShekutaamba VV Nambala.

Munyika naNambala ova hangika ve li moilonga youmbiisofi omudo 2021 pefimbo kwa li kwa ningwa oshihongingerki shokuhoolola ovabiisofi.

Nakufya Martin Ngodji okwa xulifa omudo 2021, omo kwa li a hoololwa a ninge omubiisofi.

Niitenge naye okwa li a hoololwa omudo 2021. Ovaningi veindilo eli ovo Fillemon Nekapa, Joseph Shikuma, Lamek Nambahu naJosua Nghipandwa. 

Okupitila momushiviveta wavo, ovafitaongalo ava otava pula opo Elcin a kale a kupulashi oidjemo yoshihongingerki sha ningwa omudo 2021 nomudo 2024.

Oshidjemo eshi vati osha pumbwa okukupulwashi shaashi konima yomahoololo omuhoololwabiisofi Ngodji okwa ka xulifa.

“Elcin oku na omilandu nokatendo taka ti kutya ngeenge omunhu ou kwa li a hoololwa a ninge Omubiisofi okwa xulifa nena ohaku ka ningwa oshihongingerki shipe shi na ovaulikwahoololwa vape,” ta hokolola.

Ovanhu otava ti kutya pefimbo loshihongingerki shomudo 2021 okwa li tashi wilikwa kuMunyika naNambala.

Ova hokolola tava ti omudo 2024 natango Elcin okwa ninga oshihongerki shokuhoolola Ovabiisofi osho kwa li sha wilikwa kuNiitenge. “Niitenge kakwa li e na okuwilika oshihongerki shaashi ke shi Omubiisofi pefimbo olo. 

Oihongingerki ohai wilikwa kOvabiisofi ngaashi naana kwa li sha ningwa omudo 2021,” umwe womovafita ta ti. Okwa hokolola kutya osha puka Niitenge a wilike oshihongingerki shomahoololo oubiisofi molwaashi naye okwa li omuulikwahoololwa omudo 2024.

“Niitenge okwa ninga ashike oinima yaye mwene. Ina landula omilandu dongerki yaElcin,” ta ti. Omubiisofi Niitenge okwa dengelwa lwoikando ya yooloka ashike ina kufa po ongodi yaye.

Eshi a dengelwa ongodi, Omubiisofi Hilja Nghaangulwa koshikandjongerki shokoushilo okwa ti ye ke na oufemba wokupopya kombinga yoshikumungu eshi.

“Dengela Biisofi Niitenge oye te ku pe ouyelele u li mondjila, ame kandi na oitya yokupopya,” ta ti.

Hamushangandjai wongerki yaElcin Haufiku Johannes okwa lombwela Kundana ta ti naye ke na oufemba wokupopya kombinga yoshikumungu eshi.

“Dengela aabiisofi tate Niitenge nameme Nghaangulwa shaashi ovo ovakulunhuwiliki vange,” ta ti.

Eshi a kwatafana naKundana Omubiisofi e li moshipundi shopendjela Shekutaamba VV Nambala okwa koleka ta ti oshoshili okwa mona omukanda wa dja kovakalelipo vopaveta.

“Itandi dulu okupopya kombinga yoshikumungu eshi molwaashi oshi li komhangu ashike ouyelele ondi u na,” Nambala ta ti.

Omubiisofi e li moshipundi shopendjela Veikko Munyika naye okwa koleka kutya omukanda ou wa dja komhangu okwe u mona.

Pefimbo loshivilonangeko shOvabiisofi osho sha li mOngwediva Osoondaxa okwa li pa hololoka ovapolifi novanambelewa va dja kouministeli woikwameni konima eshi va lopotelwa kutya ovanhu va dja koFinland ve uya okunangeka Ovabiisofi kave na omikanda dokulongela moNamibia.

Natango, Elcin oku na oshikumungu omo vati a kufa ovafita vahamano moilonga shaashi va ka konga oilonga koshikondo sheedolongo. Ongerki yaElcin natango oi na oshibofa tashi konakonwa kopolifi kombinga yoshimaliwa sheemilliona N$3.4 sha kana moshikefa shongerki.

-fhamalwa@nepc.com.na