Auleria Wakudumo 

Ovanhu vatatu ova kanifa eemwenyo sha dja eshi va li tava kendabala okutauluka oyana omanga okaana keedula omuwoi oka xulifa eshi ka wila mondobe yomeva. 

Omukulupe weedula 62 okwa xulifa eshi a twaalelwa komeva pefimbo ta kendabala okutauluka oshana. 

Oshiningwanima osha ningilwa momukunda Iikokola moshitukulwa shaShikoto sha ningwa Olomakaya lwopo 10h05. Nakufya okwa tongololwa oye Selma Newaya. 

Edi oda kolekwa komupopiliko wopolifi Deputy Commissioner Kauna Shikwambi. 

Otaku hokololwa Newaya a twaalelwa komeva manga ta kendabala okushuna keumbo okudja kefudiko kOnyaanya nolutu lwaye ole ya okulituwa la kaama kombada yomeva mOlomakaya. 

Oshiningwanima shikwao, olutu lomulumenhu weedula 22 ole lituwa la ninga nai kovanhu va li tava tauluka oshana. 

Eshi osha ningilwa momukunda Onambome moshitukulwa shaMusati, Olomakaya lwopo 12h00. 

Otaku hokololwa Kleopas Johannes e lixula okumonika Etitatu eshi a dja meumbo a ya vati koundingosho vopomudingonoko. 

Oshiningwanima sha faafana, olutu lomulumenhu weedula 45, omufita weengobe ole lituwa la ninga nai momulamba mofaalama hai ifanwa Brenckhorn moMaltahohe. 

Olutu laSimon Keramin vati ole lituwa Etitano 14 Febuluali 2025 lwopo 14h48. 

Otaku hokololwa Keramin e lixula okupopya nakahewa kaye kopaihole Olomakaya 8 Febuluali 2025 nongodi yaye oya dima okudja pekwatafano lavo laxuuninwa. “Kahewa kaye okwa shivifila omunghona wanakufya eshi a kanifa ekwatafano naKeramin, nomunghona waye okwa tuma omukulunhuwiliki wofaalama oyo opo a ka tale ngeenge tava mono Keramin ashike kofaalama ova hanga ko ashike ombwa,” Shikwambi ta ti. 

Shikwambi okwa holola ta ti eemhadi daKeramin oda shikulwa fiyo omomulamba omo olutu laye la hangika la ekelwa komunghulo womulamba komeva. 

Otaku fekelwa Keramin a twaalelwa komeva manga ta kendabala okutauluka omulamba. Sha xuuninwa, okaana keedula 9 oka xulifa molwaashi ka wila mondobe yomeva omo vati va li tava yowo navakwao. 

Oshiningwanima osha ningwa Osoondaxa momukunda Oningilamo moshitukulwa shaMusati. 

Nakufya okwa tongololwa oye Titus Linus, omukwashiwana waAngola. 

Edi oda kolekwa komukulunhu wopolifi moshitukulwa shaMusati Commissioner Ismael Basson. 

Otaku hokololwa vati Linus a fya omeva pefimbo va li tava yowo navakwao vanhe koufita, tava lifa oikombo. 

-wakudumoauleria@gmail.com