Ovalumenhu vavali vovadjailongo ova kwatwa po kopolifi eshi va hangika ve na omapangwe mEtitatu efimbo loshanga shomutenya potundi 14h30 koKuisebmund moodolopa yaWalvis Bay. Otuwa yovadjailongo oya kanghamekwa kopolifi ndele opolifi tai tameke okuhada motuwa yavo nokonima opolifi oya hanga mo omapangwe omaludi avali mongushu yoshimaliwa N$1700.
Ovafekelwa otava holoka momhangu yamengestalata waWalvis Bay nena.
Ovalumenhu vavali navo ova kwatwa nomapangwe Etitatu efimbo lokomatango potundi 18h00 modoolopa yaKaribib eshi va hangika kopolifi nomapangwe e na ongushu yoshimaliwa N$2 250.
Opolifi oya ti ovafekelwa aveshe ova kwatwa po nova holoka momhangu Etine.
Omulumenhu weedula 36 naye okwa kwatwa po Etivali efimbo lokomatango kOmaruru eshi a hangika e na epangwe longushu yoshimaliwa N$42 750, konima eshi a hadwa kopolifi.
Omufekelwa okwa holoka momangu Etine nomakonakono opolifi otaa twikile moibofa aishe.
Opolifi oya kunghulila oshiwana opo shi xulife po okulongifa oingangamwifi shaashi osha nyika oshiponga ngeenge omunhu ta longifa omapangwe shaashi eshi ohashi ningi omunhu a kale e na omadilaadilo okulongela ovanhu oilonga youshada.
Opolifi oya ti oshiwana nashi kale tashi lopotele opolifi ngeenge sha mono ovanhu tava longifa omapangwe.
-fhamalwa@nepc.com.na