Elkan Mwanyekange

Omudeuli wosipana yoKing Kauluma Palace okwa ti ove lilongekida nawa noku na omukumo kutya otava ka denga Eeshoke Chula Chula eshi tava ka shakena mOsoondaha yoshivike eshi moudano woliha yokatanga kokeemhadi yopombada moshilongo. Sackaria Kambode oo e li oye ta kwafele ongomudeuli wo-KK Palace pakafimbo okwa ti ovadani vaye aveshe opo ve li nomudani wokomesho Jasper Masilaet ou ina dana oshivike sha dja ko ota ka kala mo moudano. 

“Otwa hala okukwatela po ondjokonona yetu yoku va denga, otwa hala oitwa itatu shaashi oshivike sha dja ko inatu shi endifa nawa koRundu,” omudeuli woChula Chula John Sikerete okwa ti navo ove lilongekidila nawa oudano ou nova hala okudenga KK opo va kale natango pombada yoliha nota ti Osoondaha nai fike va ka ulike kutya Chula Chula oshike. 

“Otwa longa noudiinini opo tu kale pondodo apa tu li nena konima eshi twa  kanifa ovadani vahapu okuya pehulilo loshikako sha dja ko,” Sikerete ta ti. 

Ovadeuli aveshe ova pula ovayambididi opo ve uye kokapale komaudano kaShakati Independence opo ve uye ve litalele ko eshi omanyakwa okoumbangalanhu woshilongo taa ka fanga okatanga. KK Palace okwa shakena nEeshoke Chula Chula oikando itatu pandjokonona opo a vena oikando ivali manga shimwe okwa li ve lifiya ofika. 

Omaudano akwawo- mOlomakaya lomafiku aheyali kOvenduka oku na Young African pokapale kaUnam dana noTigers po14H30. 

Bucks Buccaneers otai litaalele noOkahandja FC komatango pokapale kemanguluko mOvenduka, Unam ota talelwa po koOngos, omanga African Stars otai ka talele po oKhomas Nampol pokapale kemanguluko. KOmbaye Blue waters otai talelwa po koEleven Arrows, mOtjiwarongo Mighty Gunners otai dana noLife Fighters omanga Rundu Chiefs tai lihake noJulinho Athletic koRundu.

-abbenghilai@gmail.com