RUNDUS – !Ā!nāsi ǂharugu-aob, Peter Immanueli ge a ǁaxa Maria Mwengere !hao!nāsi, ǂnamipeba !ûi!gâs tsî !gâ!gâisens !khaiba, !nāsase ‘Likongoro/Ekongoro’ ti ǀgui a ǂansaba, ǁnāti ī ǁgau!nâs hîa ǀhûhâsigu khoena !aub di ǀgurun tsî !narisarimas ǂnamipe nî hâsa nî mā!nâhese. 

Nē ǂharugu-aob ge ǁîb di ǀaweǁguib hîab nē !khaiba ǁnâsen (krokodeln) parki !nâ ra dawa!khuni ǂgaos diba ǀgoragu tsî ge mî, nēs kai huib ase ǀhûhâsib tsî ǁkhōǁkhōsa ǁgamǀgurun, aiǁgause ǁnâsen khami īn, Kavangob !āba ǁan!ganu hân ǁaegu hâse. 

“ǂGui ǁnāǂamdi ǁnâsena xu hâdi ge sida ǀkharib !nâ ǀgaisase ra hâ, ǂgui !nae!khaidi a ǁkhaehe ǁkhā, ǁanǂgāsaben nî nēs ǂnamipe ǁgau!nâsas karao. Skolgu ge !ēsa nî hō, ǁkhāǁkhāsenaona tsēs saridi !aroma ǁnā parki tawa sari-ūsa in mâ ǁaegu a ǁnâsen ǂûǁae tsî tanisenǀgauga !harasas ǂnamipe ǂansa hō tsî !āb ammi ai !norasase hâ,” tib ge Immanuela ge mî. ǂNuwis sîsengu ge ai!gûgaru, ǁîb a dana ǁkhaeb a dītoasa tsî sîsenūs !aroma a ǂhomisase. ǁNā !khaiba ǀkhuwis mā-ams tsîn ge ǀnai ministeris ǁgau!nâs dis di direktorats tsî Kavangob Aiǂoas ǀKharisi ǀAwemā!nans hâra xu ge !khō!oahe. “Nausab tsoatsoas di ǀaweǁguiba, ǁnâsen Otjiwarongosa xu nî ǁamahese ge hâ i, xawes ge Ministeris ǂNamipeb !Ûi!gâs, Haiǂgās tsî !Narisarimas disa ǀkhaeb ases nî mā ti ge mî. 

Nausas projeksa !onkhao hâ sîsenxasigu âs ǀkha ǂnāǁnâsa, ministeris noxopa ǁîs ǀkhaeb ǂnamipe nî hâ sîsengu ǀkha toa tama xui-ao,” tib ge ge mî. Nēsi hâs ge, Kavangob Aiǂoas tsî Kavangob Huriǂoas ǀkharikha di ǁanǂgāsaben gaxu kilometerga ǁnāpa xu Otjiwarongos ǁga ra !narisa, !khō!nomsa ǂnamipeb !nâ hâ ǁnâsena mûs !aroma. Immanueli ge nē tsoatsoas ǀkha ra ǁawoǁawo ǂgao, ǁanǂgāsaben tsî !narisarima-aon nî !norasa ǂnamipeb !nâ ǁnâsen ǀkha ǂangusa. Immanueli hîa ǀnai Rundus Huri-ammi tsâ!khaib tsî !nari-ūs ǂgaude ra mûǂammi ge nē ǀasa parka, ǀkharib di mûhesa-anuxūn di khoraǂuib ase ra mû.