Auleria Wakudumo 

Ouministeli wounamapya nounaimuna, eeshi, omeva nomatalululo omadu owa holola kutya owa didilika oshipaxu moshikandjohoololo shaNehale Lya Mpingana moshitukulwa shaShikoto. 

Omupopiliko mouministeli Simon Nghipandulwa okwa ti ouministeli owa ninga omakonakono oo a koleka kutya oshikandjohoololo osha ponokelwa koshipaxu. Nghipandulwa okwa holola kutya oshipaxu eshi osha didilikwa unene tashi li omwiidi nosha nambela unene komiti. 

Nande ongaho, ovanambelewa vokupombela moshitukulwa ova shiivifilwa nove lilongekida okufinda oshipaxu opo shihe lihanene oshilongo ashishe. 

“Ngeenge oshipaxu osha ningi shihapu ile sha tameke okulya oikunomwa yovakwashiwana ouministeli owe lilongekida okutuma ovanambelewa opo va ka pombele,” Nghipandulwa. 

Nghipandulwa okwa holola kutya mopaife ouministeli itau dulu okupombela shaashi oipuka itai hanauna po oikunomwa yoshiwana yo vali kai li momapya. Ouministeli ohau ningi omakonaakono omoule omanga inau ninga etokolo lokudipaa keshe oshipuka. 

Mo2021, oshipaxu osha li she liteyaulila moitukulwa yomonooli ngaashi Ohangwena, Oshikoto osho yo Oshana. Osha li sha hanuana po oilya yomapya amwe omo sha nambela. 

Eshi osha li oshikando shotete vahapu va mona oshipaxu shi li momwaalu muhapu. MOmuthiya, otaku hokololwa sha li sha fikamifa neetuwa mopate molwaashi sha laulika mopate. 

MOmungwelume moshitukulwa shaHangwena, eefikola, ovahongi osho yo vahapu pomudingonoko ova li va dja moilonga opo va tale omuhanga woshipaxu. Neudo, oshipaxu otaku hokololwa she liteyela tete moshitukulwa shaZambezi. 

Ouministeli owa holola kutya owa tuma ovanambelewa vokupombela moshitukulwa shaZambezi opo va finde oshipaxu. Otaku hokololwa oshipaxu she liteyela momapya ovanafaalama notashi hanauna po unene epungu osho yo oilyavala. Ovanafaalama otava indilwa opo va shivifile ombelewa youministeli wounamapya ngeenge va didilike oshipaxu moikandjohoololo yavo. 

-awakudumo@nepc.com.na