WINDHOEK – Ngoloneya gwoshitopolwa shaShana Clemens Kashuupulwa okwa pandula noonkondo kaaleli ya yooloka moshitopolwa moka sho ya kala nokulongela kumwe uule woomvula omilongo 20 sho e li koshipundi.
Shika Kashuupulwa okwa ti osha kwathela noonkondo opo oshitopolwa shoka shi hume komesho miinima oyindji.
Kashuupulwa ndhika okwe dhi popi nomutoolinkundana nguka ongula yEtiyali sho a pulwa omatumbulo ge ga hugunina onga omuleli gwaakalimo yomoshitopolwa shaShana uule wethimbo lyoomvula omilongo 20.
“ Omolwa aaleli yopamuthigulwakalo , aaleli yomomalelo gwoondoolopa showo aaleli miikondo yepangelo ya yoolokathana oshitopolwa shoka sha huma komeho. Hangame ashike. Ihe atuhe otwa longela kumwe notwe shi pondola,” osho Kashihakumwa a hokolola ngaaka.
Okwa tsikile ko kutya okwa pandula woo aakwashigwana moshitopolwa moka mboka woo ya kala nokulongela kumwe noshowo okutaamba ko nomaako gaali omahumokomeho noshowo omauwanawa ngoka ga etwa kepangelo.
“Andi pandula unene ookansela, aawiliki yomuthigululwakalo noshowo aaleli ayehe koonono yoshitopolwa moka nda kala ethimbo ele nonda kala nduuvite ombili kelongelo kumwe lyawo,” osho a hokolola ngaaka .
Okwa ti kutya oshitopolwa shaShana oshimwe shomiitopolwa mbyoka ya huma komeho moshilongo nonande hainima ayihe yehumo komeho yi li mo ya huma komeho shoka ngashingeyi she mu pa enyanyu enene komwenyo kumwe woo nelongelokumwe ndyoka ya kala ye na.
Kashuupulwa ngoka ngashingeyi e na omimvo 70 okwa ulikwa komupresidente gwaNamibia opo a kale omukalelipo gwaNamibia koshilongo shedhina Russia.
Nguka ngashingeyi e li omukalelipo gwoshilongo kombanda yomafuta okwa ti kutya okwa pandula woo aatolinkundana mboka ya kala noku kwathela mokwaandjaganeka omauyeelele, okundungika nosho wo kulonga oshigwana shoka tashi inyenge muuyuni.
Okwa hokolola kutya aatoolinkunda unene mOshana oya kala noku tseyithila oshigwana mwaayihe shoka woo sha kwathela unene omathimbo gefundja noshowo omalaria nooshowo omukithi gwoHIV Aids sho ya kala taya shanga uuyelele kombinga yomauvitheko gaakwashigwana.
Kashuupulwa noshowo aakalelipo yaNamibia kiilonga yi li 13 mboka opo ya ulikwa kupresidente omasiku ngaka oya li ayehe ya langekelwa iilonga yawo Omaandaha kEgumbo lyEpangelo.
Mbaka ngashingeyi oya tegelelwa ashike oku ka tameka iilonga yawo ngele ya thiki kiilongo hoka oshoka oya pewa nale iinakugwanithwalonga yawo pambapila.