Aletta Shikololos
ǀAEǁGAMS – !Nakaǂnôa Ministers ǁGau!nâs, ǂNuwiǁkhāsib tsî !Hao!nāsi ǂŪsin dis, Anna Nghipondokas ge ǁîs di gowaǀîs ǀgôana ǀasa skolkurib !aroma skolgu ǁga oahās disas gere ǂoago wekheb Denstaxtsēs ai mā, soab ai skolgu hîa ǀgôana marin di !nubusib !aroma skolgu !nâ ū!oa tama ra ina ǀgaisase !khâikhom tsî ge mî, ǁnā ǀgaub mā-amsa tama hâ tsî nēsi nî ǀûhesa. !Nakaǂnôa ministers ge ǁnāpa i ge skolǀgôa-e mâǂoa hâ skolmarin ǂoago kurib din !aroma ū-oahe ǂgao tama hâ !khais di !nae!khais khao!gâ nēsa ge mî.
Nausa gu skolga māsenxa ǁgûna xu marina skolga kō!gâs tsî ǂhâbasa xūna ǁamas !aroma a ǂgan ǁkhās hâ, xawes ge nēsa ǁgui-ai tama hâ tsî gu ge ǁnā-amaga skolga ǁnāti ī ǂhanuba ūhâ tama hâ nē maride a mā ǁoa ǀgôana skol-i tawa soa-i hâ hîa ū!oa tama isa. “ǁGau!nâs ge a mario!nâ, nausa da ǁgûna xu ra !âubasen ǀgau-i ain skola ga hui!nâsa hîa.
Aiǁgauseb skola ǀasa proxram-e ga tsoatsoa o i ge ǁgûna xu ra ǂgaoǀkhāhe ǁîn di ǂâiǀgauga skoli ǀkha ǀgoragusa.
ǁNā ǁgûn hîa ǁkhāsib xū-e mās dib !nâ hâ taman ge skoli ǀkha a ǁnâugu ǁkhā mâtin ais ǁga a sîsen ǁkhāsa, xawes ge tā nēsa nî !aroma ǀgôa-i skolǂgâsa nî ǁkhaehesa,” tis ge Nghipondokasa gere ǀgomǀgom!gao.
Hanan ǁgûna ǁnāti ī mâsiba nî hō!âs kara, o ra ǀawemāhes ge in ǁnā skoli di ǀkharisi ǁgau!nâs direkter-i beros tamas ka i o permanende sekretares di ǂans !naka nēsa !nuri. !Nakaǂnôa ministers ge ge mî, nēs ge mā-amsa tama hâ tsîn ge ǁkhāti ǀgôana xoaǂgāhe taman hâ hîa marina mātare kaihe tide. Nē ǀgaub ge ra ǁkhae in tā ǀgâsa ǁgâude xu ra ǂoaxa ǀgôana ǁîn ra ǁkhore skolgu tawa soana hō.”
Ai!âs ge Nghipondokasa ǀgôan hîa ǂgaoǀkhādi ai dīǀoaǀoa tama ge i tsî ǁnās ǀkha ǂoago kurin go hâ i xratsa ǁkhawa nî dīna ra ǂgan, in !garise ǁkhāǁkhāsen tsî ǁgau nēn go ǁkhawa a māhe !ēsan ra !gôa!gâsa.