LINYANTI – Mueteleli wa Sikwata sa Tutengo twa Likiliti, Warden Simushi ulakaza kuli mulao olibelezwi otalima zamasheleñi akutisa zwelopili mwalilalanda, one usulilwe mwandu ya milao lilimo zelobapeli zefelile ukandekiwe. Hana bulela kanako yakutambeka limbule zetalu zamulilo wamagesi mwasilalansa sa Linyanti, Simushi naize ubilaezwa kuli mulao olibelezwi hakalo, use ungile lilimo, niha buñata bwa baeteleli balipolitiki babulela butokwa bwaona kwasicaba.
“Sikwata sa tutengo twa likiliti nesinze sikasha taba ya masheleñi alilalanda mwanaha ye. Noswanela kunyatelwa kindu yamilao kono mulao osika buzwa usa nyandaela mwahalimu. Haluzibi kuli ukai kono nika eza lipatisiso. Kambe mulao wo wanyatelwa mwandu ya milao batu baluna nebasike banyanda hahulu. Luna ni lika zabutokwa, kamutala pompi ya sikelenge ilobehile, munga masheleñi kwamasheleñi asilalanda nikuleka isili. Zeo halisiyo mukala kusupa muyemeli wasilalanda kuli hakuna za eza. Nilemuhile kuli sicaba sihupula kuli hasiketa muyemeli wasilalanda una ni masheleñi mwapokoto. Hakicwalo. Nikazwelapili kubulela buniti,” nabulezi.
Nazwezipili kubulela kuli lilalanda li itinga hahulu kwalikolo, kona hababata kuli kube ni masheleñi abulukezwi feela lilalanda. Nabulezi hape kuli mwalinaha zeñwi inge Zambia masheleñi azwelopili yalilanda, asweli kusebeza hande kualabela kwalitokwahalao zasicaba. Nalatuzi taba yakuli katengo katolopo kakutisanga masheleñi aswanela kutisa zwelopili. “Purojekiti haisikakala kachenu. Bayemeli babañwi babulela kuli habasikafumana masheleñi. Nelufile lilalanda kaufela zelobapeli N$400 000. Kacwalo kuitingile kuli muyemeli wasilalanda seo usebelisa cwañi masheleñi. Hakuna silalanda sesifumana kufita sesiñwi, luabanga kaku likanelela,” nabulezi.
Muyemeli wasilalanda sa Linyanti Ivan Kabunda naitumezi kwakatengo kasikiliti kakuzwelapili kutahisa zwelopili. Naize kamaiso yambwashula ikona kulyehisa mapurojekiti. Nakupile sicaba sa Linyanti kubabalela limbule zene beilwe za mulilo wamagesi, ili teñi silalanda nesi sinyehezwi masheleñi alikana N$238 000. Naize kaofesi ya muzamaisi wakatengo kasikiliti (CRO), silalanda nesikonile kufumana sheleñi yakekezo yelikana N$38 000, kuekeza kualikana N$200 000 ane afilwe lilalanda kaufela.