Festus Hamalwa
“O twa hala okuya kofikola shaashi ehongo ola fimana, nafye otwa hala okukala twa longwa, epangelo nali ninge po sha opo tu ye kofikola. Otwa hala okukala tu shi okulesha nokushanga, otwa hala okukala ovanashilonga vomaifano a yooloka.”
Aa omatumbulo oshiwana shovayelele tashi hokolola kutya navo ova hala okuya kofikola shaashi otava mono oixuna koluhepo nondjala eshi shihe na oilonga.
Oshiwana shovayelele ohashi di pomapundo e li momukunda Omalapapa moshikandjohoololo shaMundaungilo moshitukulwa shaHangwena nosha kala po oule wefimbo lile.
Pefimbo Kundana a talela po oshiwana shovayelele Etine osha hokololela Kundana tashi ti epangelo nali tale po nawa shaashi kashili pauyuuki eshi ihava i kofikola shaashi navo ova hala okukala va mona ehongo.
Ovahokolola tava ti ounona vavo vamwe okwa li hava i kofikola ashike paife mofikola ova dja mo shaashi vahapu tava dengwa koluhepo ngaashi nondjala.
Ovadali vounona vovayelele ova hokolola tava ti ounona vavo kaveshi okushanga nokulesha onghee osha fimana epangelo opo li yandje omhito kounona vavo opo va tameke ofikola meendodo dopedu vo veli honge oinyangadalwa yofikola ya yooloka.
Tuhafeni Sackaria weedula 22 okwa lombwela Kundana ta ti okwa hala okushuna mofikola opo a ka twikile nondodo 9 omo kwali a xulila kofikola Onakatumbe combined school.
“Onda fiya po ofikola shaashi okwa li nda kwatwa konghalo yomolodu noingamwifi onghee paife onda mona kutya mboli onda ninga epuko la kula eshi da dja mo mofikola ,” Sackaria ta ti.
Okwa ti otai indile epangelo opo li mu twale kofikola ina omuhandjo shaashi ngeenge okwa i momuhandjo ota ka kala teli hongo nodjungu.
Oshiwana shoveyelele osha weda po tashi ti osha talela eshongo linene eshi shi e na omaufemba woshilongo.
“Ounona vetu iha mono oshimaliwa shopendjela eshi hashi yandjwa kepangelo shaashi kavena sha oufemba, nounona veefiyee navo ihava mono oshimalima shopendjela.” – fhamalwa@nepc.com.na