Rudolf Gaiseb

Likolo la kulikanelela kwa baana ni basali, kulwanisa bubotana ni pabalelo ya sicaba libulela kuli banana babapila mwamakululu mwanaha Namibia habalati tuso ya muuso yakubata kubazwisa mwamakululu. Tuso yeo ingelezi cwalo kuba fumanela maino, kubabatela likolo ni kubafa lico. Kulatelela patalazo yalikolo la mabasi la 24 Kandao kuli banana babalekisa mwamakululu basina mapampili anaha baka batelwa maino. New Era nebuzize muuso kuli ulela cwañi kutusa banana ba ba yambaela mwamakululu nikuca mokuyumbelwa zemasila. 

Sibuabui walikolo la kulikanelela kwa baana ni basali Lukas Haufiku naize ku ezizwe zeñata kutusa banana bao, sina kutahisa muyaho kobaya habazwa kwasikolo. “Miyaho kobaya habazwa kwasikolo ilela kubatusa. Likezo zefumaneha teñi ki zecwale ka lituto zabona, kubapotela nikubafa lituso mwamakululu; nikubona kuli bakena likolo mwalikiliti kaufela, niku kutela kwa mabasi abona,” nabulezi. 

Naize likezo zeñwi kikubaisa kwa baelezi ba makete, kubafa maino aswalelele, kubafa lico, kuba isa kwalipapali kasamulaho likolo halipumula. Likezo zeñwi kimapurojekiti akuipiliseza fateñi ni bashemi ba bona, ze cwale ka kulima miloho, kuluha nikueza mafaha. “Likezo zeo litusa mabasi kuipilisa kuli basike bakutela mwamakululu. Likolo libeleka ni maofesi amañwi kubona kuli banana bao batusiwa,” naekelize.