Charles Ndeumane
ONGWEDIVA – Kakukutu gwetanga lyopolisi yaNamibia Joseph Shimweelao Shikongo okwa ti kakele ko ku tula aalongi yiimbuluma mondholongo opolisi oyi na wo oshinakugwanithwa sho ku kwathela oshigwana nomakwatho galwe.
Ndhoka okwe dhi popi mEtitano lyoshiwike sha zi ko ndyoka lya li esiku lyahugunina lyoshigongiilonga shaapolisi yoonkatu dhopombanda mOngwediva shoka sha tamekele mOmaandaha goshiwike sha zi ko.
Mesiku ndjika omukuluntu gwoongeshefa dhoRani Group Ali Dharani okwa gandja oshimaliwa shoondola N$50 000 koshiketha shopolisi sho ku yambidhidha oshigwana. “Ka nda li dhi shiwo ngele opolisi oyi na oshiketha sho ku kwathela mboka ye li mompumbwe, sho nde shi uvu onda ti andiya ndi yambidhidhe oshiketha shoka noshimaliwa shoondola N$50 000. Oshimaliwa shoka ka shi na oondjindikila, onde shi gandja ashike momake gopolisi, oyo ye shi ethimbo nankene shin a oku longithwa,” osho Ali a popi ngaaka.
“Ota ndi ku kwashulipaleke kutya oshimaliwa shika ota shi ka longithwa muuwanawa woshiketha ngaashi sha tulwa po,” Osho omunshipundi gwoshiketha shopolisi Valheim Nepela a popi sho a taamba omambidhidho ga Dharani.
Shikongo pamwe naanambelewa yopombanda metanga lyopolisi oya li ya gandja omakwatho gongushu yoshimaliwa shoondola N$30,000 koofamily dhi li ndatu ndhoka dha mona iihuna koshikukuta. “Nena opolisi oya gandja omakwatho gongushu yoshimaliwa shoondola N$30,000 kofamily yaantu ye li omugoyi kOmatando, oshowo kosenda yaFrans Indongo yo ku sila uunona wu na uulema lyaFrans Indongo,” Shikongo ta ti.