Ofamili yomuhongifikola Martha Aron weedula 35, ou vati a dipawa kukaume komoihole oo a kala ashike naye oule eemwedi 11, oya hokolola noluhodi kutya oya fiwa moluhepo molwashi oye a li shikwete po meumbo
Opolifi oya hokolola Aron a dipawa nombele komulumenhu waye ou eli omushingi wotaxi weedula 36 peendingosho dopOshifukwa moshitukulwa shaShikoto komatango oSoondaxa.
Opolifi oya koleka tai ti omukainhu ou okwa dipawa shaashi a lombwela omulumenhu waye kutya ine mu hala vali.
Ota ku hokololwa kutya Aron okwa hangika e li mokabashu ke li peendingosho opo taa ningwa oipanyala.
Okudja opo omufekelwa okwe ya ndele te mu denge nokahalasha nokonima vati okwa kufa ombele ndele te mu tu.
Omuhongifikola ou opo a xulifila ponhele opo.
Omufekelwa okwa kwatwa po, nota pangulilwa oshibofa shedipao.
Hilma Aron omukwanambwiyu nanakufya Martha Arona okwa hokolola ta ti mumwaikadona oye kwa li ha yambidida mofamili shaashi oye aeke kwa li ha longele mepangelo.
“Mumwameme okwa li e na ombili, ehe na okatongo,” ta ti.
Hilma okwa ti mumwaina okwa fiya po ounona vaye vali okakadona keedula hetatu nokamati keedula heyali.
“Paife ke pena ou ta yambidida ounona vaye. Efyo laye mumumeme ole tu denga pomutima,” ta kwena.
Hilma okwa yelifa ta ti omufekelwa ou ka kwa li eshivike mo meumbo lavo, vali ina va didilika kutya mumwaina ha dengwa komulumenhu waye, ova ka uda onghundana yefyo.
Omalongekido epako lomuhongifikola ou oku li metifa.
Omwaka mehongo
Omukulunhu wehongo moshitukulwa shaShikoto Aletta Eises okwa ti onghundana ei otai piyaneke ovanafikola novahongifikola vopofikola opo kwa li hapa longo Aron.
“Oshikondo shehongo ashishe, ovakwashiwana ovakumwifwa koshikumungu eshi,” ta ti.
Eises okwa ti Aron okwa li a pewa oshinakuwanifa shokuyandja ounongo kovanafikola ashike paife okwa dipawa.
Okwa weda po ta ti Arona okwa fiya po omwaka wa kula pofikola yavo.
“Ovahongifikola ova fimana moshikondo shehongo molwashi ohava yandje ounongo kovanafikola. Ngeno ka pa li ovahongifikola ngeno ovanafikola ihava piti oilongwa yavo,” ta ti. Eises okwa pula oshiwana opo shi hangane okukondjifa omahepeko omomaumbo.
Okwa yandja omahekeleko kofamili yaAron noshoyo kovanafikola novahongifikola. Okwa ti ovanafikola otava ka pewa omayakulo exungumwenyo molwashi paife otava piyanekwa kopyakadi wopamadilaadilo molwoefyo lomuhongifikola wavo.
Omukulunhufikola pofikola Onambudu Combined Schoolo Jackson Itamalo okwa tanga Aron ongaa omukainhu kwa li ha longo nelitulemo.
“Okwa li omunambili e na elandulafano. Okwa li a longo oilonga yaye pefimbo alushe,” ta hokolola.
Okwa weda po ta ti Aron okwa li yoo vali e hole okuyandja omayele kovahongifikola vakwao.
Aron okwa li a longo ondodo onhi-3 nokwa li e na ohokwe yokulonga nounona.
Ohamba yOvandonga
Ohamba yOvandonga Fillemon Shuumbwa Nangolo okwa kumaida ovakainhu opo va xulife po okutambula oiputula kovalumenhu ina va shivifila ovadali vavo.
“Oiputula ina i lombwelwe ovadali opo va kale ve shishi molwashi okuputulwa komulumenhu konima yomakuma okwa nyika oshiponga,” ta ti. Okwa kumaida ovakainhu opo va kale ve na oshi li novamulumenhu vavo shaashi otashi ka leke po elinekelo.
“Fimanekeni omufyuululwakalo molwashi oda fimana. Pefimbo lonale omukainhu ngeenge ta pewa oiputula komulumenhu oha shivifile ovadali vavo,” ta ti.
Okwa hokolola ta ti elalakano lokushivifila ovadali opo ngeenge omukainhu ina hala vali omulumenhu omaliko aye oo kwa li a putula omakainhu otaa dulu okufutwa kofamili.
Nangolo okwa kumaida ovalumenhu opo va kale tava lopotela opolifi ile eembelewa dopamifyuululwakalo ngeenge tava fiya po kovakainhu ovo ve va putula.
Omakumaido kovakainhu
Omufita wongeleka Evangelican Baptist Church in Namibia (EBCN) Laban Mwashekele okwa kumaida ovakainhu opo vaha tuke ile va longife oitya ii ngeenge tava xulifa po ekwatafano lopaihole lovalumenhu vavo.
Okwa weda po ta ti ovakainhu nava xulife po okukengelela ovalumenhu noshoyo okulila ovalumenhu oimaliwa yavo molwashi osha nyika oshiponga konima ngeenge omukainhu a hala okufiya po omulumenhu ou.
“Xulife po okulombwela omulumenhu kutya okaana ka keshi kaye konima ngeenge mwa tanguna,” ta ti.
Okwa weda po ta ti ovakainhu nava lopote pefimbo ngeenge tava hepekwa kovalumenhu wavo.
Omakumaido kovalumenhu
Mwashekele okwa kumaida ovalumenhu opo va xulife po okulongela ovakainhu ominyonena molwashi ovakainhu ka veshi ovatondi.
“Ovalumenhu xulife po okuputula ovakainhu ngeenge ina mu va hombola shaashi konima yefimbo oha mu du nai ngeenge ta mu fiwa po kovakainhu,” ta ti.
Okwa yelifa ta ti ina shi puka ngeenge omukainhu ta putula ohonda yaye ashike ne shi ninge nomutima wayela pehe na omalidipawo konima ngeenge omukainhu ine mu hala vali.
Mwashekele okwa lombwela ovalumenhu ta ti okudipaa ka kushi e kandule po lomukundu ashike otashi e tele ovakwapata oupyakadi.
“Ovalumenhu omu li pula tete manga ina ninga omatokolo mai. Paife omulumenhu ou okwe tela ashike ofamili yaye oshikolo,” ta ti.
Okwa ti ovalumenhu nava kale ovatili kalunga ndele tave li hongo okukango omwakwafo kovafitaongalo, ovaxungimwenyo nosho tuu.