Charles Ndeumane
Okomitiye yomutumba gwopashigwana yi na sha nelongo, uungomba, oshowo ehumohokomeho lyaanyasha oyili metalelepo moshitopolwa shaHangwena tayi talele oopoloyeka ndhi na sha naanyasha nodha kwatelwa komeho kaanyasha kutya otadhi shi enditha ngiini.
Pethimbo ya telele po ombelwa yangoloneya gwoshitopolwa shaHangwena Sebastian Ndeitunga, omunashipundi gwokomitiye ndjoka Olivia Hanghuwo okwa ti oya hala oku ndhidhilika onkalo yoopoloyeka ndhoka.
Dhimwe dhomoopoloyeka tadhi talelwa po ongaashi Ondobe Youth Enterprise, Oshikango Youth enterprise, Omauni Agricultural Product, oshowo Onehanga Youth Enterprise.
“Otwe ya oku talela oopoloyeka dhaanyasha ndhoka tadhi yambidhidhwa pashimaliwa kuuministeli waanyasha mwa kwatelwa ndhoka dhili kohi yoNational Youth Service. Otwe ya oku tala nkene oopoloyeka ndika tadhi shi enditha tse tu ndhidhilike omashongo ngoka dha taalela,” osho Hanghuwo a popi ngaaka.
Ndeitunga okwa ti opo oopoloyeka dhaanyasha dhi adhe iilalakanenwa yadho odha pumbwa oku kala ta dhi talelelwa ethimbo nethimbo, naamboka yedhi kwatela komeho oya pumbwa oku talelwa opo ya kuthe ko iinakugwanithwa yawo neitulemo, onkene okwa pandula mokomitiye ndjoka shota yi talele po oopoloyeka ndhoka.
“Ondi uvite nawa lela oku mona iilyo yopoliamende yetu tayi ya kaantu opo yi tale oopoloyeka ndhoka dha totwapo kaanyasha moka iimaliwa yepangelo yalongithwa okudhi tula miilonga.
Onawa sho mweya okutala shoka oopoloyeka ndhoka dha pondolapo.” Ndeitunga ta ti.