Paulina Ndalikokule
OSHAKATI – Ongundu yaanyasha ye vule po300 ya li ya totwa nelalakano okwiikwiinina nokukwathathana pethimbo lyoosa, otayi ende tayi koko, sho nokuli ya totele oshilyo shayo ongeshefa.
Keddy Kanime ngoka oye omupopiliki gwongundu yOkandjengedi Unity Group okwa ti oya totele ongundu ndjoka mo2017, moka haya yambidhidhathana noshimaliwa pethimbo lyomaudhigu ngaashi oosa. Elalakano okuyambidhidha aakwashigwana yomolukanda lwaKandjengedi moka kehe oshilyo sha kala nokugandja okamaliwa ka thika poN$50. MOmaandaha ongundu ndjika oya gandja uushako woohi uuyali, uusila wuukuki, nomagadhi gokuteleka uukuki komunyasha goomvula 24 Vilma Kristian. Iinima ayihe mbika oyi na ongushu yoN$800. Kanime okwa ti omunyasha nguka okwa tothwa mo sho kwa konekwa kutya oha endaenda molukanda ta landithile omunangeshefa gumwe, ngoka he mu futu ashike oN$400 komwedhi nando oshimaliwa shika ha vulu oku shi landitha mesiku limwe.
“Otwa mono kutya omunyasha nguka oha longa nuudhiginini sho osho twe mu pe iinima mbika opo a vule okutota ongeshefa ye mwene, ye i imonene iiyemo yi vule pumbyoka ha mono ngashiingeyi,” a ti ngaaka. Kristian okwa pandula unene keyambidhidho ndyoka, ta ti otali kakwathela unene yina naanona ye yane.
Okwa ti ota ka kambadhala woo okukala ta gandja kumboka taya ka pumbwa eyambidhidho uuna ongeshefa ya tameke okweenda nawa. Yina yaKristian, Christofina Ikeinge okwa ti eyambidhidho ndyoka olya simana oshoka omwana okwa kala nokuhupa nuudhigu, a kala nokuli pegumbo nonando a pita osikola nawa molwompumbwe yoshimaliwa. Kanime okwa ti sigo onena oya longitha oshimaliwa shi vule poN$60 000 mokuyambidhidha iilyo nomokulongekidha oosa dhaakwanezimo yawo.
“Kehe oshilyo ohashi gandja oshimaliwa shoka,” Kanime a ti ngaaka.
Kanime ota kumagidha aanyasha ya longele aluhe kumwe nokukwathathana nokashona hoka ye na po.
“Inatu pumbwa okukala tu na oshindji opo tu gandje nenge tu silathane oshimpwiyu, kehe omuntu oto vulu okuyambidhidha ashike, a ti ngaaka. –ndalikokulep@gmail.com