Auleria Wakudumo
Ombelewa yaTurkey mOnamibia oya yandja oikulya i fike pongushu N$350 000 opo i kwafele Namibia okulwifa oshikukuta. Turkey okwa yandja ekwafo konima omupresidente Nangolo Mbumba.
Oikulya ya yandjwa omwa kwatelwa oushako voufila wepungu 2 000, eelitela 760 domaadi oikulya, eekilograma 1 000 deendooxa doshi, eekilograma 500 dosopa, tai ka topolelwa ovakwanedimo ovo va dengwa unene koshikukuta nove li momhumbwe tava ka tofwa oshilongo ashishe.
Omukalelipo waTurkey moNamibia, Feral Oruckaptan okwa didilika vati kutya oikulya va yandja oya longwa moNamibia, onghene oya kwafela yoo omahangano omoshilongo, aa haa longo oikulya novakwashiwana ovo tava ka mona oikulya ei.
“Turkey ota kondjifa okukandula po elunduluko longhalo yomhepo okupitila meeproyeka di kwetelwe komesho kehangano loTurkish Co-operation and Co-ordination Agency (TIKA),” Oruckaptan ta ti.
Omupedupilima, John Mutorwa okwa pandula epangelo laTurkey kekwafo la yandja, ta ti ekwafo eli otali kwafele okukaleka eenghalamwenyo dovanhu vahapu ve li momhumbwe, unene ovo ve li meenhele da divilikwa koshikukuta.
“Ohatu pendula epangelo novakwashiwana vaTurkey kevatelo eli. Ohatu ka kwashilipaleka kutya oikulya otai ka fika koovene ava ve i nuninwa. Ovakwashiwana ve li moluhepo nova pumbwa ekwafo,” Mutorwa ta ti.
Odula ei, Namibia okwa divilikwa koshikukuta molwodula oyo inai tula omata pedu a wana. Onghene, omapya mahapu inaa dja oipalwifa ya wana, edu nalo ola toka omwiidi woimuna, nomeva momatale nomomadiva oma pwiinina mo.
Epangelo ola eta po oprograma yoshikukuta oyo ya kwatela mo okuyandja omakwafo oikulya, eenhi dokukuna, ekwafo loinamwenyo, nokuandjakaneka omeva koitopolwa i lili, ya tengenekwa i fike pongushu yeebiliona N$1.6.
Fiyo opapa,epangelo ola longifa N$800 million, pa fyaala eemiliona N$600. Mafiku aa, okabinete oka pitifa ku wedelwe natango eemilliona N$16 okudja ko National Emergency Fund opo i wedele oimaliwa hai topolelwa oitukulwa.
Eemhangela vati odi li metifa okuwedela ko 64 525 komaumbo oo hama pewa nale oshikukuta, momhangela yoimaliwa yo2025/2026, ya tengenekwa i ka koshe eemilliona N$256.