Auleria Wakudumo
Omanga vahapu tava pe omukainhu a hombolwa ombedi eshi a andjaneka omafano omukainhu mukwao, vamwe unene ava va hombolwa otava yandje ombedi komukainhu ou ha longo koradio. Ova ti itava popile Hilia Shikongeni eshi a andjaneka omafano, ashike ove udite yoo kutya eshi a ningilwa kashi li pauyuuki notava pula navo va popilwe koveta.
Umwe ina hala okupopiwa kedina okwa ti kutya vati eshi tashi ningilwa omukulukadi e li meteelelo kashi li mondjila notava pula Shikongeni opo a konge ekwafo koveta paShiwambo.
Omupopiliko welelo lOukwanyama, Andrew Naikaku okwa fatulula outendo vehondelo paShiwambo. Naikaku okwa ti paShiwambo paeveta delelo lOukwanyama, omukulukadi oha dulu okupewa ehandukilo osho yo omulumenhu nakuetifa etimba.
“Omwalikadi a kwatwa oukodi komwalikadi mukwao oha futifwa eengobe nhatu omanga omulumenhu a kwatelwa mondjuwo ile polupale komwalikadi wovanhu oha futifwa eengobe mbali,” Naikaku ta ti.
Naikaku okwa weda po ta ti nomalenga ohaa dulu okufutifwa ngeenge a nyono oveta youkodi. Okwa ti elenga ile mwene womukunda a kwatwa oukodi komupiya waye vati oha futifwa eengobe nhee.
“Oshinima sha fimana vali okutya ngeenge nakuhombolwa ve lidenga nomukulukadi mukwao meumbo lomuhomboli, omulihomboli naku li dengifa ovakulukadi ava, na fute nakumona oshiponga she likwatelela koukwatya welemano,” Naikaku ta fatulula.
Naikaku okwa kumaida ovanyasha vaha lalakanene ashike oshimaliwa mokukalamwenyo kwavo.
“Ino fimaneka vali oukwatya woye nounyasha woye molwoshimaliwa. Mbela eshi to lipula onakudiwa yoye otai ka kala ngahelipi,” Naikaku ta ti.
Nande ongaho oveta yopaShiwambo oya yooloka koveta yoshilongo. Komufala wopolifi mOshana, Naftal Lungameni Sakaria okwa fatulula Etinhe kutya ngeenge omutamanekwa okwa monika ondjo moshinima osho, ota dulu okupewa ehandukilo she likwatelela Act 8 of 2009, Section 117 (2) (b), ota pewa ehandukilo lokukala modolongo oule weedula inadi pitilila punhano ile a pewe ehandukilo loshimaliwa inashi pitilila N$20 000 ile ehandukilo loshimaliwa nodolongo.
Shikongeni oo okwa pewa elifutile mo lo N$2 000 konima eshi a holoka momhangu lwotete, omhangu yaShakati mEtitano.
Shikongeni okwa taalela oibofa ivali, eshi vati a andjaneka omafano taa nyane, taa shade notaa lengifa omukainhu weedula 31 oshoyo oshibofa shokushundula oukwatya wanakuninga oshihakanwa. Shikongeni okuli eli humbata eemwedi nhano nokwa pula opo omupanguli Mozay Jansen opo oshibofa shaye shi kalelwe po komupanguli wopaumwene.
Kakele kelifutilemo loN$2 000, oshibofa osha undulilwa komesho 23 Aprili 2024 omanga omakonakono taa twikile nopo a hangike a pulumuna.
Shikongeleni okweli futila mo modolongo ashike ota kala eli koshi yeemhango tadi shikula; inaya mekwatafano nanakuningwa oshihanwa meyukililo ile ta longifa eemhangela dime, ina longa oilonga imwe ya faafana nashi a ninga, na kale kokule nanakungingwa oshihakanwa eemita 300, inali dopa momakonakono opolifi neeveta doshilongo.
Kundana okwa lopotelwa komupopepi wovalihomboli kutya mokudja modolongo Etitano, Shikongeni okwa shuna keumbo lavo nomusamane waye noveli mewi limwe.