Charles Ndeumane
Minista gwomauyelele, omakwatathano nuungomba Emma Theofelus okwa ti okabinete otaka popile omalunduluko miipambele yoshikukuta ngaashi egwedhelo lyiikulya, egwedhelo lyaantu mboka taya pewa iikulya, oshowo ekondjitho lyomanyutu.
Theofelus okwa popi ndhoka moonkundathana nuumisteli we moka a li ta popi kombinga yomatokolo ngoka ga ningwa po kokabinete kaNamibia.
Anuwa okabinete oka tsu kumwe opo omutengenekwamwaalu gwiikulya yoshikukuta gu gwedhelwe noshimaliwa shoomiliyona N$16,8 okuza koshiketha shopashigwana shiinima yopaulumompumbwe.
Okabinete oka yambidhidha ishewe egwedhelo lyomwaalu gwomagumbo ngoka haga mono omayambidhidho giikulya yoshikukuta nomagumbo ge li 64,525. Oshimaliwa shoomiliyona N$256 otashi ka longithwa mokuninga egwedhelo ndyoka momayalulo gokomumvo 2025/2026.
Theofelus okwa ti ngoka ogamwe gomomatokolo ngoka ga ningwa kokabinete moshigongi oshitimulongo noshitihetatu shoka sha li sha kwatelwa komeho kupresidente Nangolo Mbumba.