OMULONGA – Ovakalimo vomoshikandjahoololo shaMulonga moshitukulwa Ohangwena ova etelwa omayakulo opolifi popepi molwaashi paife ova tungilwa oshitaashi shopolifi.
Oshitaashi shopolifi osha tungwa momukunda Onamukulo moshitukulwa shaHangwena.Osha patululwa pambelewa Etitano kukakukutu kopolifi Inspector General Joseph Shikongo.
Mopaife ngaha mOhangwena omu na oitaashi yopolifi 12. Oshitaashi osha tungwa kongushu yoshimaliwa eemilliona omaN$6.5. Okwa didilikwa shaMulonga shikandjohoololo osho shimwe sha kula mOhangwena.
Ovanhu okwa li hava ende oshinano shile okukakonga omayakulo opolifi koshitaashi shokOndobe. Inspector General Shikongo okwa ti ombelewa yaye otai twikile okuyandjaneka omayakulo opolifi koshiwana. Okwa kumaida oshiwana opo shi ka konge omayakulo opolifi nokukala sha lopota oibofa pefimbo.
“Ya kuleni nawa oshiwana pe hena omunhu ta ningwa okatongo,” Shikongo ta ti.
Okwa popya ta ti oshiwana na shi longele kumwe nopolifi okukandeka oimbuluma momidingonoko davo.
Shikongo okwa ti ombelewa yaye ita ka fiya emanya la londa ku li kwao kombinga yovapolifi ita ve li umbata nawa.
Kakukutu kopolifi okwa ti ovapolifi nava ulike oshihopaenenwa shiwa moshiwana molwashi ohava longo nokutula po elandulafano nokukaleka po eameno loshiwana.
“Omupolifi ina pumbwa okukala ta kolwa e li meendingosho a djala omudjalowoilonga. Omupolifi ina pumbwa okukala ta kufa ombinga moilonga ya nyika oumbudi ile ta ningile ovanhu omahepeko oukashike kookanhu,” ta ti.
Okwa lombwela ovapolifi opo va fimaneke ovanhu aveshe nokupopya nawa noshiwana ngeenge tashi ka konga omayakulo opolifi koitaashi. Shikongo okwa kumaida ovakainhu opo va xulife po okuamena ovalumenhu vavo ngeenge tava ningilwa omahepeko omomaumbo.
Okwa weda po ta ti omunhu keshe ta ningile ovanhu omahepeko omomaumbo na lopotwe opo a pewa ehandukilo lopaveta molwashi eshi otashi kwafele okushunifa pedu omahepeko oukashike kookanhu.
Ovakalimo va dja komikunda da yooloka moshikandjohoololo shaMulonga okwa hafa eshi va tungilwa oshitaashi shopolifi.
Lusia Paulus omukalimo womomukunda Onamukulo okwa ti oshitaashi shopolifi shipe otashi kwafele okushunifa omahepeko omomaumbo pedu.
“Otuna ovanhu va ninga oihakanwa yokudengwa noumbudi woimuna, onghee paife otava ka lopota pefimbo” ta ti.
-fhamalwa@nepc.com.na