Charles Ndeumane
OSHAKATI – Omuleli gwaanyasha oshowo omunashipundi gwongundu yo-IPC moshitopolwa shaShana Michael Mwashindange okwa indile aaleli yoongundu dhopapolitika opo ya kumagidhe aayambidhidhi yawo ya yande omaipumomumwe naayambidhidhi yoongundu dhilwe.
Mwashindange ndhika okwe dhi popi pethimbo lyoshigongi shoka sha ningwa kokomisi yomahogololo (ECN) mOshakati uunambo.
“Aayambidhidhi yoongundu dhimwe dhopapolitika otaya ulike kutya ngiika oye na uuthemba ye vule aayambidhidhi yoongundu oonkwawo. Oshiningwanima shimwe osha ningwa omasiku ashike ngaka pomahooli pOkatana mOshakati mpoka omuyambidhidhi gwo-IPC a li a yelutha epandela lyongundu ndele omuhingi gwombetsa gumwe okwa zi ko ndele ta kutha ko epandela ndyoka e te li tuula po. Ngele iinima yoludhi ndoka oya tsikile aantu otaya ka vulwa ndele omaipumomumwe taga tameke. Onkene otandi idhile aaleli ya londodhe aayambidhidhi yoongundu dhawo opo ya kale nombili naayambidhidhi yoongundu dhilwe,” Mwashindange ta ti.
Okwa okumagidha wo aaleli ooyakwawo opo ya yande omalaka ga nika iikolokosha nenge taga vulu okweeta omaipumomumwe. Ta ti aaleli mboka taya longitha omalaka ngoka pethimbo lyiikonga yawo yomahogololo naye shi hulithe po.
Mwashindange okwa tsikile ta ti aantu naya yande ombepo yetopoko molwiinima yopapolitika oshoka ayehe Aanamibia nokonima yomahogololo yo aantu yamwe.
“Ongaaleli otwa pumbwa okusa oshimpwiyu mwaashoka tatu popi oshoka otatu gandja oshiholelwa kaayambidhidhi yoongundu dhetu.
Ngele omuleli ota popile uuhwapindi otashi limbilike oshoka otashi vulika aayambidhidhi yongundu ye ya kuthe ko oshiholelwa shoka ndele taya piyaganeka aayambidhidhi yoongundu dhilwe. Atuhe Aanamibia nokapu na ongundu yopolitika nenge omuntu pauhandimwe ta vulu okutya oku na uuthemba wu vule wamukwawo nenge anuwa okwa mangulula oshilongo,” osho Mwashindange a popi ngaaka.
Iiningwanima yuuhwapindi pokati kaayambidhidhi yoongudhu dha yooloka dhopapolitika ongaashi moka omuyambidhidhi gwoSWAPO a hingi ohauto yobaki u uka mokati kaayambidhidhi yongundu yo-IPC muJuuli nuumvo moshitopolwa shaMusati pethimbo ya li moshigongi shongundu moka mwa ehamekwa omuyambidhidhi gumwe gwo-IPC.