Ohoromende tji ya tjiti okuyandja ondjozikiro kOmbara Otjitambi yOvaherero, omuyaruke Hosea Kuṱako, nokutunga onganda yovipwikiro vyomazemburukiro we na wina onganda paa rarere nokupendukira, okuyaruka nokuteza ozondambo ze.

Operesindenda Nangolo Mbumba wa tjere Oritjavari tja twirisire onganda ndji ndja tungururwa korutjato rouye wakandino ndi i yohoromende. Tji ya ri 10  ku Tjitarazu, ndi ri otja kOmihoko Omikutasane, Eyuva Rouye Rousemba Womundu. Ma tja omatwirisiro nga kaye hengere meyuva ndi tjinga Kuṱako, eye nguri Kaviṱonḓema wOtjiṱiro Otjindjandja, aa zemburukwa mouye.

Mu nao ohoromende otji ya toora otjihorera tje tjinga Kuṱako aa toorere na tjindi omutenge wohangauti nondatumisire yovandu nu mombwiro yawo moruveze oruzeu rotjitandi tjotjihoromende tjohuurire yEhi rOvandoitji no yombangu yomuhoko notjivara ya South Afrika. 

Tjingetjo Ombara yOvaherero mOmongua, Bethold Tjiundje, ma tja ondjozikiro ku Kuṱako ndji ya pwire meyuva ndi tjinga onyengo yo 1959, oyo ndja twara kondjembo aya hohiziwa i yomambo wa Katjikururume wokukwekurura ondatumisire yEhi rOvandoitji na South Afrika.   Na tja eyuva rondjozikiro kuye karapeke kOvaherero nungwari oro Vanamibia avehe. 

Vetara Mungendje, nai nguri momuriro wonganda yawo, wa yakurire ovimbumba momuvanda wawo ama tja opu ve ri muwo nu mave karere muwo nganduu  tji va kongorere ovaṱi novakuru vawo, muvo mu muna omuyaruke Ondangere Katjitira Mungendje, ngwa ya kOtjombuindja. Otjimnugunda tja handura okuza mo 1925, ovandu tji va tjinda momatuririro peke tjimuna Omburo, Kuṱako paa tumbire, tji va zire motumbo twohangauti nombonḓi yohuurire. 

Mungendje ma tja onganda yawo nomuvanda wawo mbwi kana vya humburukire nOvaherero novanane vayo. Avehe omu va pitira okuza kovayaruke Clemence Kapuuo, Kuaima Riruako, Vekuii Rukoro na nguri motjihavero nai, Mutjinde Katjiua. Momatamunino we nga  kamburisire ombimbi ndji ma itja: “omuatje ope ri”.