Omupopiliko wopolifi moshitukulwa shaHangwena Warrant Andreas Nghiyolwa okwa kumaida oshiwana opo shi tonatele oimuna yasho efimbo lomatango manene molwaashi oumbudi woimuna wa londa moshitukulwa.
Okwa ti ovanhu vamwe ohava vake po oikombo yavakwao ndele tava ka dipaa nokulya ombelela mefiku ledalo lomukulili.
“Ovanhu vamwe ohava vake oimuna ndele tava ka landifa okapana,” ta ti.
Okwa ti unene tuu omikunda da dingonoka odoolopa yEenhana oda lopotwa oibofa ihapu yovanhu tava vake oimuna.
Nghiyolwa okwa weda po ta ti oshikandjohoololo shaKongo osho shimwe sha didilikwa shi na oumbudi weengobe wa londa pombada unene tuu keehambo.
“Omunhu ngeenge okwa vake po eengobe damukwao ohe di shingile moAngola ile e di twale komikunda dokokule,” ta ti.
Mexuliloshivike okwa lopotwa ovalumenhu vane va kwatwa po konima eshi va vaka ongobe kOkongo.
Ongobe oi li pongushu yoshimaliwa eeN$9 500.
Ovafekelwa ova shinga ongobe koshuunda ndele tave i shingile komukunda umwepo.
Ova monika konima eshi oshiwana sha longela kumwe nopolifi okuyandja ouyelele.
Nghiyolwa okwa lombwela oshiwana opo shi longele kumwe momidingonoko davo okukondjifa oumbudi woimuna.
“Omunhu ngeenge okwa monika ta shingi oimuna ihe shi yaye oshiwana nashi lopotele opolifi opo a ningilwe omapulapulo,” ta ti.
Okwa ti ovanhu nava ninge oinyongo yoikombo i li popepi nomaumbo.