Auleria Wakudumo
Omukulukadi weedula 59 oku li monghalo ii, sha landulu eshi vati a li ta kendabala okulikufa omwenyo pamukalo wokulitomeka omundilo.
Vati eshi osha holoka konima eshi omukainhu oo a lombwelwa kutya omusamane waye oku li mekwatafano lopaihole novakainhu vamwe.
Omukulunhu koshikondo shokukonakona oimbuluma moshitukulwa shaShana Deputy Commissioner Frederick Ndjadila okwa koleka oshiningwanima eshi ta ti omukainhu okwa twalwa koshipangelo shepangelo shaNandjokwe ashike okwa tuminwa koshipangelo shaShakati a ka mone epango la wedwa po.
Oshiningwanina osha ningilwa molukanda Epya mOndangwa, sha ningwa Etivali lwopo 17h00.
Otaku hokololwa omukulukadi a li e ya okutalela po omusamane waye okudja komukunda Okapuku momafiku 07 Maalitsa 2025.
“Pefimbo lokutalela po, omukulukadi okwa shivifilwa vati kovashiinda kutya omusamane waye oha yi momilele novakainhu vamwe,” Ndjadila ta ti.
Omukainhu vati okwa kwatwa komadiladilo okulidipaa ndele ta shangele omusamane waye etumwalaka lokongodi kutya ote likufa omwenyo, te limangeleke ile te litomeke omundilo.
“Omanga omusamane waye a li koilonga mEtivali, ovashiinda ova mona omwifi wa tau di meumbo lavo,” Ndjadila ta ti.
Ovashiinda ova endelela okudima omudilo ndele tava pondola okuxupifa omukulukadi.
Opolifi oya holola kutya oya hanga endini leelitela mbali domahooli li li oshitata poshiningwanima.
Ndjadila okwa weda po ta ti momundilo omwa pila eembete, omakumbafa, oikutu, okila yokutalaleka naikwao imwe.
Otaku hokololwa omukainhu eli monghalo yii nota mono epango lopaunamiti moshipangelo shepangelo shaShakati.