Abraham Mwanyekange 

Ehangano ledina Kwafela Oshiwana ola yandja omaano outemba vavali kovakwaneongalo va Elcin meongalo Eenghango moshitukulwa shaHangwena Osoondaxa. 

Omutot ipo wehangano Kornelius Paulus okwa lombwela Kundana ta ti outemba ova pewa omukokele weedula 98 osho yo okaana keedula heyali. 

“Meekulu okwa tetwa okuulu omwedi wa dja ko nosha kala shidjuu kovakwafeli vaye unene okupewa omavatelo ngeenge ta yi koshipangelo” Paulus to hokolola. 

Paulus okwa weda po ta ti ovaneumbo ove mu shiivifila kutya ova kala ashike hava longifa oshipundi okumu tumbila motuwa ngeenge ta shuna komakonakono koshipangelo. 

Okwa ti Kwafela Oshiwana okwa kala noku ya peenhu dovanhu opo  va monepo omakwafo outemba voo va shiive okuyandja ekwafo loludi eli kwaavo veli pumbwa. 

Lucia Nghifikwa ou a ta tekula Iipawa Hangula weedula heyali okwa li yo a holola ehafo laye eshi okatekulu ka pewa okatemba. 

“Ondapandula Kwafela Oshiwana eshi etu pa okatemba. Ondi wete paife omutekulu wange ohandi ka kala noku enda naye keshe apa handii molwaashi okatemba oke shi ninga shipu oku mu humbata noku kala naye,” Nghifikwa ta ti. 

Nghifikwa okwa ti ovanaulema okwa tiwa ina va holekwa ndele nava etwe poluhaela va monike.  Paulus okwa ti mopaife ehangano ola yandja outemba 91 kovanhu tava lumbu loulema okudja eshi la totwa mo2020. 

Okwa ti odula yoneudo ola yandja outemba vatano. 

Kwafela Oshiwana okwa dana yo onghandangala okutuma oikulya koshitukulwa shErongo pefimbo lo Covid-19 opo ika palwife ovo vali moupyakadi woCorona. 

Paulus okwa holola yo kutya ehangano ola kwafela yo okuwapaleka oipangelo neefikola moshilongo ashishe. 

Paulus ota indile kOvasamalia opo va yambidide ehangano eli opo ondjodi yaye yokuvatela keshe ou eli momumbwe i kale yawanifwa po. 

Okwa pandula oohandimwe ovo hava tondoka nokuyambidida ehangano unene ngeenge ta li konghola peenhu davo. 

– amwanyekange@nepc.com.na