OSHAKATI-Kakutu komatanga gopolisi yaNamibia Joseph Shikongo okwa pandula oshigwana moshitopolwa shaShana sho ongula yEtitatu sha holoka mengathithi oku nyanyudhwa kiilyo iipe yopolisi sho yali ya saluta oku za kOngwediva sigo Oshakati.
Iilyo yetanga lyopolisi iipe oya tameke okusaluta Etiyali mepandaanda enene lyNdangwa, moku ilongekidhila oshituthipito shawo. Aapolisi mboka taya mana omadheulo gawo yeli lwopo1 800, notaya ka pitithwa mo Etitano komupresidente gwoshilongo Netumbo Nandi-Ndaitwah, tashika ningilwa mokapale kemanguluko mOshakati.
“Shika otashi ulike kutya oshigwana otashi e ndele pamwe naashoka tashi inyenge moshilongo. Eholoko lyoshigwana olya pendje etumba noku ulika kutya pokati kopolisi noshigwana o pena ekwatathano lya kola,” Shikongo ta ti ngaaka.
Ta ti, kiilongo yimwe ngele opolisi tayi e nde momapandaanda aakwashigwana ohaya matuka po ye yi tila, ihe moNamibia oshigwana oshuuvite ko ayihe tayi ningwa naashoka yena wo okuninga.
Shikongo okwa gwedha ko wo kutya uuna oshigwana shina ekwathano ewanawa nopolisi nena otaya vulu wo okulwitha iimbuluma.
“Opolisi oyo oshigwana, noshigwana osho opolisi. Ina tu hala nando omayipumomumwe oshoka oshigwana osho hashi dhana onkandangala onene okugandja uyelele kopolisi, shoka tashi yambindhindha okuhulitha po nenge okushonopaleka iimbuluma moshilongo,” ta fatulula ngaaka.
Kakukutu komatanga esiku ndyoka okwali eende taminike noku pandula oshigwana oshowo oku shi kumagidha shi tsikile okuy ambindhindha thana ngaashi sha ningi ngaaka oshowo okutsikila okulopa iimbuluma momindhingoloko dhawo.
Aakwashigwana naanona yosikola oyali ya holola euvonawa sho ya tala iilyo ye tanga lyopolisi tayi salute momapandaanda.
Selma Shoopola ngoka a li a thikama kooha dhopate omanga ta minike kakukutu komatanga Shikongo, okwe mu pandula sho a longekindha aapolisi ya uulike uunongo wa wo.
“Inima mbika ohatu yi mono ashike komizizimbe dhooradio, ihe nena otuyi wete nawa. Aanona oyo pala shili,” Shoopala ta popi ye ta imemeha mo.
Ta ti, Shikongo na tsikile noku longa ngaashi ta longo ngaaka.
vkaapanda@nepc.com.na