OSHAKATI – Uudhano woongonyo pokati kaBulelo Nghipondoka naPaulus Ndjambi a tseyika nawa “Get Rich” owa hulile medhingoloko etitatu, kape na ngoka a sindana.

Uudhano mboka wa li wa hili oshigwana moondoolopa dhokonooli owa holoka konguloshi yOsoondaha kokapale kemanguluko kOshakati, wa longekidhwa ongoshinyangandhalwa shokumwenyeka momauliko gomazimo niipindi ge li ko.

Oongonyo ndhoka odha li dhu umbwa okuza edhingoloko lyotango,sigo oosekonde oonshona dha pita medhingoloko etitatu, sho omudheuli gwaGet Rich kwa li u umbile mo oshifanduke, nuudhano owa zi pondje.

Omunashipundi mehangano lyokukondolola omaudhano goongonyo Armas Shivute, moonkundathana noshifokundaneki shika okwa popi kutya omaundhano goongonyo pokati kaGet Rich naBulelo oga li ashike okumwenyeka.

“Uuna omaudhano goongonyo ge li pokati komupopyokokidhaningonyo nomumwenyeki, ohaga kala taga kondololwa omolwoompango nomaladulathano ga tulwa po. Uuna kwa ndhidhilikwa kutya uudhano otau kondo oompango, ohau kankamekwa,” ta fatulula ngaaka.

Shivute ta ti, aadhani mboka oya li ya yi sigo okolweetho olutitatu, nonando Get Rich kwa li a tameke okuholola shoka she mu etitha mokapale, naBulelo okwa ka tameka okulongitha uunkulungu we ongomudhaningonyo, shoka sha etitha uudhano wu ye pehulilo. 

Ta ti, uudhano mboka owa ende nawa naadhaningonyo oya dhana shi ikwatelela koompango dha tulwa po.

“Kombinga yuudhano waHarry Simon naPaulus Shimweefeleni “Ninja” kandi na natango ontseyo, oshoka uuyelele mboka inau thika ko natango koombelewa dhetu,” ta ti ngaaka.

Omutoolinkundana gokoradio yaKati fm Damian Shuumbwa a tseyikila nawa omaudhano okwa kwashilipaleke kutya omaudhano oge enda nawa, noga dhanwa ngaashi ge na okudhanwa.

“Omaudhano goongonyo ge li pokati komuponyoki nomudhani gowala aluhe ohaga kankamekwa uuna taga ende nayi, oshoka ngele oye ethwa ya tsikile ope na gumwe taka monitha mukwawo oshiponga,” ta fatulula ngaaka.

Shuumbwa okwa ti omudheuli gwaGet Rich okwa li u umbile molinga oshifanduke oshoka okwa mono kutya otashi ende nayi, nuudhano nau hule.

Nonando ongaaka Get Rich konima yomaudhano okwa popi kutya okwa li a hala okuya sigo okedhingoloko eti-10, oshoka uudhano ine u uva nawa.

Ta ti, nonando a dhengwa oongonyo mepunda kuBulelo, ine dhu uva nawa oshoka anuwa okwa kala ta dhengwa sho ta idheulile olugondhi ndoka.

-vkaapanda@nepc.com.na