OSHAKATI – Aakalimo yokonooli, unene yomomudhingoloko gwOshakati otaya nyenyeta aafuthi taya ponokele omagumbo gawo unene ethimbo lyomutenya omanga ooyene ye li kiilonga. 

Otaku hokololwa natango aantu taya tentenwa koondjila pethimbo taya yi nenge taya zi kiilonga, omanga yamwe haya tentenwa sho taya zi mokapale moka mu na omauliko giipindi nokuyugwa iinima yawo. 

Mehuliloshiwike omulumentu gumwe okwa adha egumbo lye alihe kOnawa kOshakati lya yela, kamu na nando osha, okutameka koombete, okila yokutalaleka niikutu. 

“Onda li nda thiki megumbo lyandje kwa toka. Shoka sha kundu ndje omweelo gwa eguluka, ndi pite onda kundwa koonyama dhi li pevi, negumbo lya mbwalangandja, iinima yandje ayihe ya yi,” ta popi ngaaka. 

Ta ti, nonando a li a lopotele opolisi okuza ongula, oshoka kakwa li a hala okunyenga sha omolwomakonakono gopolisi, opolisi oya ka thika uusiku. 

Ta nyenyeta kutya opolisi ohayi kutha ethimbo unene okugandja omayakulo, nonando pwa li tapu vulu okumonika uuyelele washa, itashi ningwa we oshoka ethimbo olindji unene lya pita po. 

Omulandithi gumwe momauliko giipindi goExpo mOshakati Soini Amadhila okwa ti, Olyomakaya sho ta zimbuka lwopotundi 00h00 pomweelo gokapale opwa li pena iita. 

“Aantu oya li taya yugwa oongodhi nomakeenisa osho wo iinima yawo. Nonando kwa li pe na aapolisi, oya li ye li meni lyokapale,” ta ti ngaaka. 

Ta indile kutya opolisi nayi kale yi li pomweelo gokuza mo, opo ya kale ye li megameno sho taya londo moohauto. Natango oshiningwanima shimwe osha holoka pomagumbo ge li popepi nokapale, sho omumati gomimvo 27 a li a adhika a kuutumba pondje yegumbo nokukuthwa ongodhi ye yopeke koonkondo. 

“Onda li nda kuutumba pondje sho nda li nda mono okahauto ke na aamati yatatu yomimvo dhopokati ka kankama pungame,” ta hokolola. 

Ta ti, mohauto okwa li mwa zi omulumentu gumwe ta indile omeya gokunwa, sho ngeno anuwa a yamukule kutya kamu na sha, okwa uvu anuwa a pama moonyala. 

“Otwa tameke okukondjela ongodhi yandje, omanga yakwawo ye li mohauto,” ta popi ngaaka. 

Ta ti, omulumentu ngoka okwa li e mu sindi oonkondo nokumatukila mohauto, e tayi yi. 

Ta gwedha po kutya ohauto kayi na oonomola konima. Oshiningwanima shoka okwa li sha holoka moshanga shomutenya. 

Opolisi oya ndhindhilike eyindjipalo lyomateyo gomagumbo Omukuluntu gwopolisi moshitopolwa shaShana Commissioner Naftal Lungameni Sakaria okwa ti, aapolisi oya tulilwa po owina pokapale okuyanda iiningwanima yi li ngaaka yi holoke. 

“Otatu tsikile okulonga nuudhiginini opo iiningwanima yi li ngaaka yaa holoke nokugamena oshigwana shetu,” ta ti ngaaka. 

Ta ti oshigwana nashi kale aluhe sha thiga mo omuntu momagumbo yo taya kala ye na oonomola dhopolisi. 

-vkaapanda@nepc.com.na