Okomisi yomahogololo, Electoral Commission of Namibia (ECN) oya kumagindha oshigwana shi longithe ompito ndjika okwiinyolitha uukalata womahogololo gookansela yopaitopolwa oshowo yomalelo goondoolopa ngoka tagaka ka kala ko nuumvo muNovomba.
Omainyolitho ngoka taga ningwa omasiku geli o10 oga tameke Omaandaha, no taga ka hula momasiku 19 Aguste.
ECN Okwa pititha omushangwa kutya omainyolitho ngoka oga nuninwa mboka yaana uukalata womahogololo, mboka yewu kanitha oshowo mboka ka kwali ya gwanitha omimvo 18 sho kwali kwa ningwa omahogololo gopaupresidente omumvo gwa zi ko.
“Ompito ndjika itayi endulula, ihe otwa hala kehe gumwe a mone ompito yoku ka hogolola momahogololo ngoka ga tengenekwa ga kale ko nuumvo,” ya nyola ngaaka.
Omunambelewa omukuluntu mokomisi yoECN Peter Shaama okwa ti, aantu otaya ka pitikwa ashike okwiinyolitha miikandjohogololo moka haya zi ethimbo ndika, moka tayaka hogololela natango.
“ECN okwa tula aalongi okukwathela omahogololo yeli 4 233 miitopolwa ayihe 14, ya tulwa pomahala ngaashi oongeleka oosikola, iipangela oshowo poosenda dhiigongi dhomomindhingoloko,” Shaama ta ti ngaaka.
Shaama okwa ti ita pu ka ningwa we omaishangitho ga gwedhwa po konima gaa ngaka, onkene ota indile aantu ayehe mboka ya hala okukutha ombinga momahogololo gookansela yopayitopolwa oshowo yomalelo goondoolopa ya longithe ompito ndjika ya ishangithe manga pu na ethimbo, yo taya faalele omikanda dhomondjila,” ta kumagidha ngaaka.
Ta gwedha po ta ti oshitopolwa oye na mo aalongi mboka taya longo aantu ya tseye iipumbiwa ngele tashiya kokwiishangitha uukalata womahogololo, oshowo aahwahwameki taya hwahwameke aanyasha opo yaka hogolole ngele ethimbo lyomahogololo lya thiki, oshowo okuya longa esimano lyoku hogolola.
Shaama okwa indile ayehe mboka ya hala okuishangitha uukalata womahogololo ye shi ninge manga pu na ethimbo lyagwana opo kaaya ka matuke komunute gwahugunina.