Zebaldt Ngaruka 

“Ombango yandje omonganda muno.Oruyaveze ondu ma ru pangura ozonḓero zouye wopendje, puna okuungura oukukutu no ku hino kuporera” Junior Marenga omunyande wotjimbere omutanda okuza kOndu ya Mukundua matja otjomundu nguno zondando ozonene motjimbere otjoruyaveze rwe. 

Juniora omuriyandjere nomuuungure omukukutu nguno ndando yokuryamisa komurungu otjimbere otjoruyaveze rwe. Eye ondui nomuyande ohongora wotjira tjotjirongo otjikwatera the itji OEastern Swallows tja Komumbonde, meraka romyanda tji tji tjiukwa Otjotembisa. 

Eye nai nguna ozombura o-16 mo 2023 otjerikuta konganda ohupike yomitanda motjimbere indji OJulinho Athletic Academy okupuisa ounongo we, okuhara ondjiviro noku nyanda pondondo yokombanda. 

Eye unyanda motuveze atuyevari kongotue mokati na mondivitivi, oto tuturi otuveze ku kutjiukirwa ozonyose zotjimbere. 

Matja otjimbere orutjato rwe okuza kouṱiti. “Mbekura ambi nyanda puno mapanga motjirongo tjetu. Orusuvero rwehore omurwautira. 

Mberikuta kOacademy indji oku rihupika okuvaza ondondo yokombanda moruyaveze rwandje,” matja. Pendje nombepo ongondoroka ndjahita muye, watarera ovayande varwe mbakara nondoneno nu itji wina otji tje mupa otjivepo kutja ahatoora otjimbere ondeka. 

Okamutanda inga karira oko mo zombuze ape ozombura mbari nḓa kapita tji ka nyandera ozonyoze za Pukiro akena ozombura o-14 uriri. “Itjimwe tjitjiṋenge tjotjivara mondjendero yandje. 

Okurira umwe wovanyande movanyande vondjiviro tje ndji honga tjinene. 

Epukiro rina ovana viyandjewa ovingi no ku munika otja umwe wavo nozombura o-14 uriri otjina tji the ndjipa ombango yapeke okukambura oruyavze rwandje rotjimbere no ku hina enyando,” Junior matja. 

Ondando ye harukuru okurira omuyande wotjimbere wondondo yokombanda nganduu tji ma yenene oku kuramenapo ehi. Mozondoneno ze motjimbere nai yari okutaara otjirarakaneno mombatasaneno yo MTC Hopsola yomitanda na wina okuyandera Epukiro. 

“Ondando yandje omburandji okutaara ombatasaneno indji no ku hina okuaarwa ehore nandarire rimwe,” matja. 

Eye nai uri mondondo indji oitja murongo posikore indji Ocentaurus nu ukambura kutja aviyevari omahongero notjimbere ovinanḓengu.