Lahja Nashuuta
OSHAKAT-Kudika evango eli lina kara asi lyokuhova moNamibia lyomutaro lyoICU, mosipangero sepangero saOshakati kuna kumoneka asi ntaanti vasimane kusidika, ngesi kuna kara ponoperesenta 90% yirugana eyi yina kara asi vana yimana nare.
Evango ndi etungo eli lina kara asi lyomutaro, kwapura yimaliwa yokusika koN$35 million, ngesi kuna kuligazarera likapwe mo 22 November 2025. Apa nye ngalikara asi kwakurugana, ngalikara nye asi evango eli ngavatuma nye nokuyavatera nomukunda odo dokomuzogo, eyi yina asi eyi yokutuma vantu ndi vaveli koVenduka ngesi ngano tayikahaga. Apa nye kayikereko yokukadingura evango olyo, mukurona pamberewa moministry woukanguki nekaro nawa Penda Ithindi kageve ruhafo rwendi kukwama sirugana esi vanarugana, nokupandura mudiki asi kuna rugana sirugana sosiwa unene. ‘’ Mutungi ana kudika evango eli, gahepa kudiva asi varugani vendi varugane moomu vana kurugana nomu tuna kuyindindira.
Nsene kapisi ngoso hawe tayizonagwisa mauwa nagenye tuna kundindira.’’ Yimo ana kugava erondoro. ‘’ Evango eli, kuna kara asi lyelike lina kara ngesi moNamibia. Yipo nye asi vahepa kusimana nosiruwo, yipo asi twaha tupu hena vantu koure ndi vazumbanese nomwenyo dawo. Eyi kuna kara mulyo unene vanatura kevango eli.
Twahepa kuyimana kukwama moomu yina kara pelikwamo. Ithindi katente asi elikwamo lyokuranda nomutji ntani yiruganeso nayinye yomo ICU, nare vaturamo elikwamo lyokuyiranda makura evango eli liyakare nanayinye yapumbwamo. Age katente asi eyi kumna kara yomulyo nokusikisamo nzodi zetu April 2026, nokutanta asi yiweka yangesi kapi yakeremo mosirongo setu. ‘’ Ekuliko lyangesi hawe nali vatera vantu mokuretesapo magano gomawa unene. Yomulyopo unene, projeka ezi kwazitulisapo noyimaliwa yepangero eyi atutumbura asi mutero, omu yina kara asi epangero kuna manamo mokutura asi kwato muntu ogu nahepa morwa kugwana uhaku wanavenye, yimo ana kufaturura. Mwenya kampani zakudika evango eli Andwell Bwanawaza kapandwire ministry keruganeno kumwe ntani elituromo posiruwo nye esi vanadike evango eli. ‘’ Nayinye kuna kugendapo nawa.
Ose kuna kurugana nawa nye twahepa kupandura ministry kweyi avafutu nosiruwo. Ose kuvhura tumane yirugana eyi komeho lika sikemo ezuva lina karapo lyokumana, Bwanawaza yimo ana kutanta.
-inashuuta@npc.com.na