Auleria Wakudumo 

Opolifi moshitukulwa shaMusati oya tula moipandeko omulumenhu weedula 46, omukwashiwana waAngola eshi a hangwa e na eendjebo dee-AK-47 di li nhano dihe na eembapila dasha osho yo oikoto yeendjebo i li itano. 

Oshiningwanima eshi osha ningilwa momukunda Epalela- Omakuva mondjila yokuya koRuacana moshitukulwa shaMusati, sha ningwa Etitatu lwopo 01h20 lwaapo. 

Omukulunhu wopolifi moshitukulwa shaMusati Ismael Basson okwa koleka oshiningwanima eshi. 

Opolifi oya holola kutya omufekelwa okwa tulwa moipandeko sha landula eshi opolifi ya li tai ningi omapekapeko oimbuluma moshiwana ndele tai li tu omukwashiwana ou ena eendjebo dihena eembapila. 

Omufekelwa okwa patululilwa oibofa ihamano. 

Oshibofa sheteyomhango loifufuta, okatendo katiheyali ko1996, eshi a hangika neendjebo dihena ombaapila, a tauluka oveta 15 yoifufuta, okatendo kotete ko1996, ine li ufa kokatendo katiheyali ko1990 kokupitika epito loifufuta peengaba, oshibofa eshi teya omhango 39 yokukala noifufuta inai pitikwa, a tauluka oveta onihamano yo1993, oveta yoifufuta keengaba. 

Opolifi oya holola kutya omufekelwa okwa hangwa neendjebo nhano deeAK-47 rifles hano oshoyo oikoto yeendjebo deeAK-47 oyo hai ifanwa omagazine moshiingilisha. 

Odula yad ja ko, pomudingonoko opo tuu opo opa kwatwa omulumenhu weedula 24 konima eshi a hangwa neendjebo deeAK-47 dili heyali nokoto yado. 

Edi oda hangelwe koshi yombete yaye meumbo komukunda Ontoko moshikandjohoololo shaNesi. 

Omakonakono opolifi okwa li a holola kutya eendjebo edi odali vati tadi tembulwa okuya konhele inai hololwa. 

-wakudumoauleria@gmail.com