Taimi Haihambo
Oilyo yoSwapo i li 12 oya teelelika i kale ya kufa ombinga ongovaulikwahoololwa momahoololo oukansela muNovemba neudo.
Omukwatakanifi woSwapo moshitukulwa shaMusati Sacky Kayone okwa ti, movakufimbinga omu na ovakainhu vavali novalumenhu 10.
“Meekansela dikulu omu na vanhe va dja mo, omanga vahetatu tava shuna mo. Koilyo yomalelo eedoolopa otu na ko ovaulikwahoololwa ve li 38,” ta ti.
Kayone okwa ti ovaulikwahoololwa itava ka ya moikonga yomahoololo, omafano avo oo ashike taa ka tulikwa meni loshitukulwa nopeefikola, opo ovakwashiwana va kale ve shi oipala yovakufimbinga momahoololo oukansela. Kansela wokoshikandjohoololo shaNesi, Festus Petrus oo natango naye e li moshivalo shovakufimbinga ava va hala okushuna koshipundi okwa ti ye ngeenge okwa shuna koshipundi okwa tokola exumokomesho leepoloyeka li twikile.
Ta ti osho ta ka tameka nasho ngeenge okwa pewa omhito yokushuna koshipundi vati okwa hala a ete eemboola domeva momikunda di li 10 odo da hupa ko dihe na eembola. Konima yaasho vati natango okwa hala okuandjakaneka omeva okopomba komikunda di li 15, odo di na oupu wokupewa omeva okopomba. Eshi vati ote shi ningile okudilila koshi yopoloyeka hai ufanwa Ruacana South Water Supply Scheme.
“Natango ope na eendama di li nhee hadi handjakanifa omeva komikunda da yooloka odo da pumbwa okulafululwa. Ope na yo okanaala ke li pamwe netaka ka pumbwa okulafululwa shaashi oko haka yandje omeva kovafanaalama ava hava longo oikulya keenyala meni loshitukulwa. Aishe ei onda hala okuwanifa po ngeenge nda pewa omhito yokulela vali,” ta ti.
Moshutikulwa natango omu na eenhele di hena onetwork yaMTC, osho hashi longifa ovanhu nodjuu vati.
Petrus okwa ti moule weedula nhano edi a kala mombelewa ina dula okumana keshe shimwe, ashike ngeenge okwa pewa omhito a shune koshipundi, koshikumungu shonetwork ya-MTC osho yo onetwork yomakufukufi ee-tv neeradio okwa hala okushitula moilonga.
Vati moshikandjohoololo ove na mo opoloyeka i na sha nepya lovakwashiwana, oyo va hala oku i tula moilonga.
“Otwa hala ovanhu va kale hava longo oikulya yavo unene ngaashi oilya, oyo twa pangela omhangele kutya ngeenge oya limwa ndele tai fiki pefimbo lokuteya, otai kala hai kala tai ka pungulwa komaanda oo taa ka landwa ndele taa kala haa kala kombala yUukolonkadhi ya pungulwa. Ngeenge ondjala ile oshikukuta osha fiki vo ovanhu tava i va ka pewe oikulya ei va longa kombala,” Petrus ta yelifa.
Okwa ti yo ngeenge ovanhu ove mu hoolola ndele a mona omhito yokushuna koshipundi, ota fi oshisho kutya moule weedula nhano ndele va pewa oshimaliwa, okapale aka ka nhuninwa omaudano a yooloka nako oke na okupwa.
“Eepoloyeka adishe edi otadi ende ashike koshimaliwa. Ngeenge epengelo ola yandje oshimaliwa, oilonga yange oi na okulimonikila,” ta ti. Okwa twikila kutya Onesi oshikandjohoololo shi na ovanhu va koya 23 000, ndele ove na shike okapangelo.
Vati ngeenge okwa pewa eenghono natango a lele, ota ka undula opo oshipangelo shi tulwe pondodo yi li hwepo.
-taimihaihambo2000@gmail.com