Opolisi moshitopolwa sha//Kharas oya manga po omulumentu gomimvo 46, sho a adhika nokawe inaaka kweywa.

Sha ikwatelela kepeko lyopolisi lyiiningwanima yomehuliloshiwike, omuniilonga ngoka okwa li a kutwa kehangano lyokwoopaleka, tali ithanwa Welwitschia Cleaning Service, ndyoka lya pewa okontalaka yokwoopaleka kuNamdeb.

Opolisi oya ti, omulumentu ngoka okwa li a mangelwa pomweelo gokupita mo momina mpoka hapu hadhwa aantu ngele taya zi mo momina kOranjemund.

Otaku hokololwa kutya omulumentu ngoka pethimbo kwa li ta zimbuka miilonga, okwa li a monika keshina lyokuminikila kutya oku nalyshinima molutu.

Anuwa okwa li a falwa koshipangelo, hoka ndohotola naye a li a mono kutya oku na sha molutu, e tashi kuthwa mo.

Okawe hoka anuwa ka kuthwa mo, oka monika kutya kakwa li ka kweywa natango. 

Moshiningwanima shimwe inaashi faathana, opolisi koshitopolwa Omusati oya lopota oshiningwanima shekwatokoonkondo, sho okanona komimvo hamano anuwa ka kwatwa koonkondo kaalongwa ye li mondondo ontiheyali.

Sha ikwatelela kepeko lyopolisi oshiningwanima shoka osha ningwa oshiwike sha zi ko kosikola Sakeus Iihuhua Combined koNakayale moshikandjohogololo shOutapi.

Otaku hokololwa kutya aanasikola yaali yomondondo ontiheyali oya ponokela okanona kokamati koomvula hamano pethimbo kwa li taka ka talaleka mokandjugo, ndele taye ka kondekele mo.

Aalongwa mboka yaali anuwa oya li ya tsu ominwe okanona hoka konima yako.

Okwa lopotwa kutya inaya mangwa po, ashike omakonakono gopolisi oge li metifa. -vkaapanda@nepc.com.na