Eshi ovanapolitika va nyanuna omaliko avo membo lo2019/20 Asset Declaration Register, omwa ulika vamwe ve na oukengeli munyika wa kwatela mo oipambuliko momahangano, eefaalama nomaumbo nakupwe.
Oshikundaneki shoNampa osha nyanuna pepandja likumwifa laMinista womudingonoko noutalelipo Pohamba Shifeta oo e na omaumbo avali limwe oleenduda 12 nalikwao eenduda nhano komukunda wambulavo kOngenga.
Kwaayo okwa wedwa vali eumbo leenduda nhee lili kolukanda loohashike shalye koKleine Kuppe, moshilandopangelo. Shifeta oye vali mwene woPlot 64 ili koHerbothlick Estate ina eehekta 6.7, [hano ifike poupale vetanga vaheyali]. Minista ou okuna vali eeplota mbali –imwe okEenhana, naikwao oko Henties Bay.
Shifeta oku na yoo oimbambuliko ili 24, 000 moBank Windhoek.
Membo omo tuu omo, Minista Utoni Nujoma – oo efimbo limwe a li a pula opo omaliko oilyo yomutumba wopashiwana a ha nyanunwe omolwa eameno lavo, epandja laye nalo oli shi okutalika.
Nujoma okuna oipambuliko ili 1,200 mOld Mutual naikwao ili 100 000 moFNB Tax-Free. Epandja laye natango otali ulike a na oipambuliko ili 2000 mehangano loNamibia Harvest naikwao ili 2500 mehangano lEtosha Fisheries. Omutotiveta ou natango ota ulike e na oipambuliko ili 175 mehangano ledina Namibia Quandaries noshoyo eepelesenda 14 doipambuliko yehangano loTsumkwe Gam Trust. Kakele kwaayo, Nujoma oku na eepelesenta 33 doipambuliko yehangano Blue Sea Fishing Trust, eepelesenda 10 mOshiwana Trust, eepelesenda 50 mOkawa –olo li nasha noikwamina. Membo ladja ko Nujoma okwa li a ulika pepandja laye kutya oku na omaumbo a ne –moWindhoek, Ongwediva noshoyo mo Kawasaki shaJapan. Erkki Nghimtina ye oku na oipambuliko 400 mOld Mutual, eumbo moWindhoek ye oye mwene woComplex yedina Helao Nafidi Business Complex ili moshitukulwa shaHangwena. Nghimtina oku na yoo ofaalama ili kOtavi, ifike peehecta 5400 nosho yo epya kOmahenge.
Embo olo oli na yoo ovatoti veta ovo tava ulike va ongela omaliko momukokomoko wefimbo. Umwe womovanapolitika ovo oJames Sankwasa oo a li ominista yopedu yoilonga mepangelo ladja ko. Sankwasa oku na eumbo longushu yoN$65 000 noPlota yomomola 5451 koKatima Mulilo molukanda laBoma. Oplota oina ongushu yoN$180 000.
Oku na yoo vali onhele koNgweze Location nongushu yayo oyoN$300 000.
Vali oku na edu lounene wo1600 square-metres olo eli pa edina Sankwasa ili koMafuta natango moshitukulwa shaZambezi. Oku na yoo eumbo kolukanda lomakeke koAcademia moWindhoek, li na ongushu yeemilona N$1.3 Sankwasa oku na vali oyeendifo itatu, oMercedes Benz ML 500 ongushu yayo N$550 000 nokali ei landa mo2012, Toyota Hilux bakkie notuukala yoToyota Camry. Vali Sankwasa oku na omambakumbaku okupulula eli a tatu nongushu yao oN$805 000. Minista nale, Bernhard Esau oo e li modolongo ye oku na oipambuliko ili 600 mOld Mutual naikwao 50 moAgra. Pefimbo a yandja popya omaliko aye okwa li umwe womomawiliko omahangano –Nafau Holding Company (Pty), Namibia Meat Producers CC noBorn Africa Investment (Pty) Ltd. Oku na yoo eumbo koHochland Park, Farm Dakota 35 koshitukulwa shaGobabis epya kOnamutenya moshitukulwa shOshikoto noErf 2970 koExtension 12 moHenties Bay. Oo ta pangulwa pamwe naye, Sacky Shanghala, a li nale ominista youyuki oku na epya koshitukulwa shaOshikoto nokoshitukulwa shaKunene. Nonande oikundaneki imwe moshilongo otai ti Shanghala oku na omaliko omaumbo ile omadu moNamibia naSouth Africa, oinima oyo ina i ulikwa po pepandja laye.
Shanghala oku na oipambuliko yeepelesenda 50 mOlea Investment 9 CC, oyo vati ya longifwa moku teka mo oimaliwa noku longifwa moshikumungu osho paife sha shivika nedina Fishrot. Oku na yo oshipambuliko sheepelesenda 50 shedu ile etungo ledina Erf 3485 Ongwediva CC.
Oshilyo momavalulo Omholo, Cambadara noAaron Mushimba Family trusts. Omuleli wongudu yoPopular Democratic Movement (PDM) McHenry Venaani oku na ofaalama yedina, Farm Jurfan 340 ina eehekata 4,000, naikwao Farm Olitii 1243 oina eehekata 1,900. Venaani oku na yo etungo ile edu kOtjituuo. Oku na yoo oshipambuliko sheepelesenda 100 mehangano lOtjohima Investment, olo hali tungu nohali longo yo oilonga ina sha nounamapya.
Omuleli wongudu yoRally for Democracy and Progress (RDP) Mike Kavekotora ye okukulumnhu wehangano lOzohi Fishing Pty Ltd, noku na oshipambuliko sheepelesenda 10. Omukulunhu yoo mehangano loTunacor Fishing. Kavekotora oku na ofaalama yedina Farm Hopewell 240 ili kOutjo ina ounene weehekata 4,500 noku li oshilyo shomavalulo edina Vita Thom Scholarship Fund. Minista wounamapya Calle Schlettwein, ke na ngeshefa oku na okaflata konduda imwe koSwakopmund nomoWindhoek.
Vipuakuje Muharukua woPDM ye oshilyo shehangano leehahende ledina Swartbooi and Muharukua Attorneys, omo veli nomuleli wehangano loLandless Peoples Movement (LPM), Bernadus Swartbooi. Oku na yoo eumbo mOndangwa.
Minista woilonga noyeendifo, John Mutorwa, oku na ofaalama younene weehekata 5,000 omaumbo avali, limwe omoWindhoek nalikwao oko Rundu. Oku na yoo eeplota mbali koKavango East. Omukaleki womutumba wopashiwana Peter Katjavivi oku na oshipambuliko sheepelesenda 50 moKatjavivi Enterprises CC, ehangano olo li na eumbo limwe moWindhoek. Oku na yoo oshipambuliko sheepelesenda 50 moAquarius 15 Investment CC, noshipambuliko sheepelesenda 35 moMonteleone 14 CC nomahangano oo avali keshe limwe oli na okaflata moWindhoek. Katjavivi oku na ofaalama moshitukulwa shaKahandja neumbo moWindhoek. Penda yaNdakolo oo a li nale ominista yeameno pepandja laye ope na ashike epya laye lomahangu.
Eshi a pulwa a tye ko sha komaliko oo, omukaleki womutumba wopashiwana Peter Katjavivi okwa ti Nampa napopye nahamushanga weumbo lopashiwana Lydia Kandetu.
“Ombelewa yange ohai shange ashike osho tashi yandjwa koilyo. Ihatu i kondjifa opo i tupe keshe shimwe fye iha tu i pulapula shinasha nomaliko oo ya yandja,” Kandetu ta ti.
-Nampa