Taimi Haihambo 

Ongwediva – Omukulunhu woshitaasi shaNgwediva Allo Matheus okwa ti momwaalu wovanadolongo va idililwa modolongo yaNgwediva va koya po102 omwa dja ashike ovanadolongo vahamano ovo va kufa ombinga momahoololo.

Okwa ti vati okuyelekanifa momahoololo odula ya dja ko, vahapu vomovanadolongo ova li va hafela omahoololo, nova kufa ombinga lela kwa li. “Omwaalu wovanadolongo ava twa idilila owa koya po102, ashike vahapu ova anya okukufa ombinga,” ta ti. 

Vamwe ava va idililwa modolongo yaNgwediva, vahapu vomuvo vati ova dja keedoolopa da yooloka, nonghene itava dulu okuhoololela modolongo yaNgwediva omu ve lihanga.  “Vahapu vomuvo ova dja koikandjohoololo yokokule,” Matheus ta yelifa.  Okwa twikila kutya oku va twala va ka hoolole keenhele davo oku va dja natango oshi na ondjila ile, sho va li noho oshi na ondilo. 

Matheus okwa ti momwaalu waava va hoolola vati omu na ashike ovalumenhu, ndele kamu na nande omukainhu umwe. 

Andreas Tuyoleni omunadolongo umwe oo a kufa ombinga momahoololo, okwa ti ye oku udite etumba eshi vo va dimbulukiwa kepangelo. “Kanda li ndi shi ngeenge nokuli ohatu dimbulukiwa tu kufe ombinga,” ta ti.

Iiyambo Joseph oo naye e li mokalimosho okwa ti okwa hafa shaashi kakwa li nokuli a teelela  a etelwe omahoololo manga e li konima yekumba. 

“Onda pandula lela eshi epangelo tali twikile noku tu pa oufemba wetu,” ta ti. 

Omukulunhu woshitaasi okwa ti pefimbo lomahoololo, ovanadolongo ava va kufa ombinga ova li tave lihumbata nawa, nokape na nande omakuyunguto asha. 

-Taimihaihambo2000@gmail.com