Auleria Wakudumo
Ovanyasha, ovakulunhu novakulupe ova holoka momwaalu muhapu okukufa ombinga momahoololo oukansela novaleli vedoolopa moshitukulwa shaHagwena.
Ohamba yOukwanyama, Meekulu Martha Mwadinomho yaKristian Nelumbu oye umwe womovakulupe va kufwa momutumba komahoololo.
Meekulu Mwadinomho okwa holola kutya molwoukulupe, iha dulu vali okulinyengaanyenga molwounghundi weedula. “Ihandi ya pondje shito, ashike nena onde ya apa opo ndi hoolole. Oshiwana osha pumbwa okuhoolola opo shi yandje omawi asho opo shi dule okukwafa epangelo. Ngeenge ovanhu ova hoolola, nena epangelo lange otali yi komesho nokulitula kumwe moukumwe umwe,” Ohamba tai holola ngaho.
Ohamba oya li ya kwatelwa komesho kungoloneya mukulu woshitukulwa shaHangwena Sebastian Ndeitunga.
Ndeitunga okwa holola kutya okwa holoka pouhamba waUkwanyama shaashi opo e li shangifa okuhoololela omahoololo oukansela.
“Osha fimana opo ovanhu va shiive apa ve na okuhoololela opo vaha ka shunifwe ko vo va kale inava kufa ombinga,” Ndeitunga ta holola.
Omunambelewa wokakomisi komahoololo posenda Olunghono moshikandjohoololo shaShikango, Johanna Shihepo okwa koleka kutya ovanhu veendodo adishe otava holoka momwaalu muhapu.
Shihepo okwa ti oshiwana osha hovela okweenda okudja po03h00 youfiku, naashi va patulula ova hanga engungo lovakwashiwana le lilongekida okuhoolola.
Umwe womovahoololi oo ta kufa ombinga lwotetetete Hambeleleni Nakale weedula 18 okwa ti okwa kufwa komahoololo momutumba opo a ete elunduluko moshiwana shaye.
“Onde linekela omuleli wange oo handi ka hoolola ota ka tula oshiwana shaye komutima. Onda hala omuleli mupe a ete oilonga movanyasha osho yo okweeta olusheno kolukanda letu lOlunghono,” Nakale ta holola ngaho. Kundana eshi a enda nokutalela po eesenda da yooloka domahoololo, okwa mona kutya ovakulunhu opamwe novanyasha tava mbomboloka momwaalu mu shambula okukufa ombinga momahoololo.
Kundana okwa didilika yo kutya oshiwana shihapu osha hoololela peenhele opo va shangifwa. Eshi osha kwafa vahapu vaha shunifwe ko vo va dule okukufa ombinga momahoololo.