Opolisi yaNamibia onkene tayi tsikile okukunkilila oshigwana shi kale uupathi osho wo okuthiga omagumbo gawo metonatelo uuna tashi ka talela po pethimbo lyomatango omanene.
Omupevikuluntu osho wo omukuluntu gwopatolola gwopolisi moshitopolwa shaHangwena Bennet Muyambango okwa ti, omasiku omawanawa gokomumvo omanga taga ende gu uka popepi oya hala oshigwana shi kale shi li uupathi ethimbo alihe.
Ta ti uushiinda nawu kale wa yaga kesipa ethimbo ndika.
“Lombwela mushiinda shoye kutya oto thigi po egumbo lyoye kaali na omuntu nenge u konge omuntu a kale megumbo lyoye ngele oto yi kefudho,” ta kumagidha ngaaka. Muyambango okwa pula wo aanamagumbo opo ya lombwele oongundu dhokutonatela pomaushiinda dhoneighborhood kutya otaya zi po.
Ta pula oshigwana opo shi longithe otekinologi yi li ko mwa kwatelwa ndjoka hayi kwatha aantu opo ya mone shoka tashi inyenge momagumbo gawo taya tala koongodhi dhopeke.
“Opolisi otayi londodha oshigwana opo shi ikaleke kokule niimbuluma pethimbo lyomatango omanene,” ta kumagidha ngaaka.
Okupitila miikundaneki ya yooloka aakuluntu yopolisi miitopolwa ya yooloka oya popi kutya, oya ilongekidha okulwitha iimbuluma oshowo okutaalela omaupyakadhi taga ka holoka pethimbo ndyoka.
Natango oya kumagidha oshigwana shikale sha kotoka, oshoka ethimbo ndika aafuthi oya tegamena okuteya omagumbo omanga oyene taya ka talelapo kiitopolwa yimwe.
Opolisi oya kumagidha omagumbo ga kale gena omukeeleli ethimbo alihe, go naga kale ga tema pondje ethimbo lyuusiku.
“Omutenya omalamba naga kale gadhima oshoka aafuthi ohaya hilwa komalamba shoka tashi ya pe kutya kamuna omuntu megumbo,” ta yi ti ngaaka.
Opolisi oya kumagidha oshigwana shikale mekwatathano ewaanawa naashinda ya wo opo ya kalelathanepo uuna ya mono omayinyengo ga puka.
Ya gwedha po kutya, aayendinandjila oshowo ooyene yiihauto inaya thiga iinima yongushu moohauto oshoka otashi nana oombudhi dhi teye oohauto e taya yo ya kuthamo shoka shi li mo.
“Kehe omukwashigwana na kale ena oonomola dhopolisi yi li popepi naye, opo a vulu okulopota iimbuluma tayi holoka nenge a vule okulopota omayinyengo ga puka,” ya kumagidha ngaaka.
-vkaapanda@nepc.com.na