Rauna Kalola
Sininke esi vandindira siruwo sosire /Naras water pipeline ngesi kuna kutameka nye vaziture mosirugana momukunda vadimburura gokutunga moOkombahe, momukunda horowero gwaDaures.
Eyi kuna reta nye mauwa aga naga twara eparu lyovantu monaruwa ntani tavagwana nye mema aga navahuguvara mukunda ogu gwakara moErongo vadiva asi kwakara udigu nomema gokunwa vatungimo.
Apa nye kakahuyungisire vatungimo momukunda gwina nguuru gwaErongo Nathalia /Goagoses katente asi projeka zangesi kuna kulikida elituromo lyepangero nokugwedako asi epangero kwahara kumona asi ekuliko kuna kusika kovantu navnye kapisi womodoropa velike.
‘’ Epongo lyanayina kuna kara lyomulyo unene morwa kuna kulikida asi epangero kuna kusika nakunye Namibia namunye, vantu kuna kara tavandindire ekuliko ano ngesi lina tameke nye kuwiza.’’ Yimo ana kutanta.
Nguuru kayididilikire asi nomulihu edi kwadirugana meyereko lyosimaliwa lyomo 2023/2024, yina kutanta asi egano lyewa mokuza komeho. Eyi yina kukwamako ngesi kuna kara nye kutamununa nomulihu diguse sinano sokusika ko 500 m omu nye nadikasika ko nomulihu daNam water.
‘’ Eyi kuna kulikida nye uwa womatungo ntani vatungimo moOkombahe tavagwana sirugana ndi mema aga noureru ,’’ yimo ana kutanta. Nguuru Goagoses simpe katente udigu ou vana kara nawo womema nokuhundira nye vatungimo asi vakunge mema ogo vana kugwana nomarunone makwawo vana kugwana. ‘’ Epiro mema kapi lina kara asi lina tugumu lizonagwise elikwamo lyetu, age kahundilire vatungimo varuganese mema monaruwa morwa nkenye eta mulyo unene.
Ogu nage kahuyungire posiruwo sokutameka kusima pevango, kansela gwaDaures Inecia Brandt katente asi projeka ezi kuna kumoneka asi kapisi elikido tupu nye kuna kara somutaro. ‘’
Ose kuna pongo apa nayina kapisi kulikida tupu nye kuna kutanta asi kuna kara mutaro omu tuna kuyitura mosirugana. Ose kuna kutura mosirugana eyi yipo maparu giovantu gakare gana wapa.
Kugusako nye kugava eparu kovantu, projeka ezi simpe nazigava sirugana kovantu posiruwo sosisupi ntani siruwo sosire, kukwama omu dakara nongendeseso detu doyirugana omu vantu navagwanenamo kansonso vavatere mapata gawo.
Malikwamo gangesi kunagatara asi kuvatera paekonomi ntanin paeparu nokuwapukurura mukaro gwetu monkarapamwe.
Projeka ezi navazirugana nye monontambo, ntambo zokuhulilira kuna hamenemo matungo ntani evango lyokupungura mema yipo vagusepo mukaro ogu gokupira mema yipo nye tukare nosirugana sina kukarapo mosiruwo sosire. Vatungimo kavakere vana hafa nokutanta asi projeka ezi hawe tazigusapo nye udigu wepiro mema ntani eparu lyovatungimo moOkombahe naliwapa nye unene ngesi.
Rauna Kalola mugavi nombudi koministeli zoMICT moErongo.