Omunambelewa womukainhu ta longele koshikondo shomavyulonghalo okwa kufwa moilonga pokafimbo shaashi vati a ya mokandjuwo nomunadolongo osho shi li sha puka. 

Omukulunhuwiliki koshikondo sheedolongo Commissioner General Raphael Hamunyela okwa koleka oshiningwanima eshi. 

Hamunyela okwa ti omukainhu oo womunambelewa okwa monika koufano a uka mokandjuwo nomunadolongo. 

Okwa ti okwa kufwa moilonga omwedi wa dja ko Desemba noku li paife ta ningilwa omakonakono omoule. 

“Osha puka eshi omukainhu oo a ya mokandjuwo nomunadolongo shaashi ina shi pitikwa,” Hamunyela ta ti. 

Otaku hokololwa kutya pamwe omukainhu oo oku na eshi a ka yandja komunadolongo meholeko osho paife sha eta omalipulo mahapu. 

“Omukainhu ou ngeenge okwa ningilwa omapulapulo nomakonakono oidjemo otai ka eta ngeenge ota dulu okushuna moilonga ile ahawe,” Hamunyela ta ti. 

Hamunyela okwa kumaida ovanabelewa tava longele komavyulonghalo opo ve lihumbate nawa efimbo keshe nokuliufa komilandu da tulwa po. 

“Ovanambelewa komavyulonghalo ohava pewa omadeulo omudo keshe nghene ve na okulihumbata ngeenge ve li komesho yovanadolongo,” ta ti. 

Okwa yelifa ta ti omunambelewa keshe ta longo oshilonga sha puka oha kufwa moilonga ndele ta ningilwa omakonakono. 

Kombinga ikwao, Hamunyela okwa ti ovanambelewa tava longele komavyulonghalo ohava kala va taalela omashongo a yooloka mwa kwatelwa okuhepekwa koupyakadi wopamadiladilo. 

“Otwa pumbwa okulongela kumwe nghene tu na okuyambidida ovanadolongo osho yo ovanambelewa tava longele komavyulonghalo. 

Oshi li eshongo linene la taalelwa komavyulonghalo,” ta ti. 

Hamunyela okwa ti onghalo yomapangwe taa twalwa komavyulonghalo oya shuna pedu paife. 

Okwa ti okwa pandula shaashi eshi otashi ulike efano liwa osho yo omalihumbato mawa kovanadolongo. 

Okwa ti ovanadolongo natango onghee nga tava twikile okulonga oilonga iwa komavyulonghalo ngaashi okulonga moikunino younamapya nosho tuu. 

-fhamalwa@nepc.com.na