ONGWEDIVA – Ehangano lyokupungula oshimaliwa shopenzela dhaaniilonga (GIPF) olya ti, oprogalama ndyoka yeya po nayo okugandja omukuli goku tunga nenge okulanda omagumbo, itagu ka longithwa oompumbwe dhopaumwene.
Dhoka odha popiwa komunashipundi gwehangano lyoGIPF Martin Inkumbi sho kwali ta fatulula nkene oshigwana shina okukutha omukuli koopenzela dhawo, oshiwike sha zi ko mOngwediva.
Oshigongi shoka okwali sha gongalwa kaakalimo yomoshitopolwa shaShana, shoka shuulike kutya oyendji oyeli mombumbwe yomalukalwa.
“Onda hala okuyelitha kutya omukuli nguka ohagu gandjwa ashike kaaniilonga yepangelo oku za pwaamboka haya mono iiyemo yopevi sigo oyo pombanda,”Inkumbi ta fatulula ngaaka.
Ta ti, oya dhidhilike kutya aaniiloga yepangelo oyendji yena iiyemo yopevi ihaya longitha omukalo ngoka hagu pewa aaniilonga okukutha omagumbo yo taya futu ondando yili hwepo, “subsidy” omanga mboka haya mono iiyemo yili nawa oyendji ohaya longitha ompito ndyoka.
Inkumbi okwa fatulula kutya, shoka otashi ulike kutya aaniilonga yepangelo haya mono iiyemo yili pevi, kayena omalukalwa.
“Sho osho shoka tweya po noprogalama ndyika yoku gandja oshimaliwa ku kehe omuniilonga gwepangelo opo yaka tunge, yaka lande nenge yaka longulile omagumbo gawo, oku za koshimaliwa shawo hashi pungulwa koGIPF,” ta popi ngaaka.
Ta ti, oshimaliwa shoka ohashi gandjwa sha ikolela koshimaliwa shoka omuniilonga oshowo omugandji gwiilonga haya pungula noGIPF oshowo eemvula dhe mpoka ethike.
Inkumbi okwa ti, oprogalama ndyoka ombwaanawa no ya mono omayindilo ogendji okuza koshigwana no yendji oya yamukulwa nale.
“Onda hala okuyelitha kutya oshimaliwa shika itashi ka gandjwa okugwan itha po oompumbwe dhaaniilonga, okulanda oohauto, okufuta oondjo niikwawo oyindji, ihe ota tu ka kwashilipaleka kutya otashi kala longithwa shina sha negumbo,”ta fatulula ngaaka.
Omunashipundi gongunduwiliki mehangano (GIPF) Penda Ithindi, okwali a totha mo kutya ongushu yoshimaliwa sho-GIPF oya koko noopelesenda omugoyi. Ithindi ndhoka okwe dhi thamuna ongula yEtine mOshakati, sho kwa li kwa pitithwa pambelwa olopota ndjoka ya ndjokonono omiyalu dhomapungulo goshimaliwa momukokomoko gomumvo 2024/25.
“Sha ikolelela kolopota ndjika, ehangano olya longo nawa noonkondo sho oshimaliwa sha koko okuza poobilliona N$167 omumvo gwa yi, sigo oobiliona N$183 ngashiingeyi.
Omwaalu ngoka otagu holola nkene eliko moshiketha shehangano tali nkondopala,” ta fatulula ngaaka.
Ithindi okwa fatulula kutya ehangano ndika olyi lile po okufuta omauwanawa gaantu mboka ya kala nokupungula no- GIPF omanga taya longo, uuna ya ka thiga po iilonga nenge ya thika momimvo dhoshipundi shevululuko.
– vkaapanda@nepc.com.na