EENHANA – Minista omukulu gwiiyenditho niilonga oshowo nakulwa omukulu Erkki Nghimtina okwa fumbikwa Olyomakaya komayendo gomapendafule kEenhana moshitopolwa shaHangwena.
Nghimtina okwa hulitha mepupi lyomimvo 77, momasiku sho kwa li gahetatu gaFebruali, a hulithile megumbo lye kEdudja moshitopolwa shaHangwena.
Omupresidente gwoshilongo Netumbo Nandi- Ndaitwah momushangwa gwa leshwa komupevi presidente Lucia Witbooi, okwa tanga Nghimtina onga omulumentu omuvuliki miilonga ngoka a kala noku gwanitha po iilonga ye ngaashi eyi ineekelelwa.
“Nghimtina okwa longela epangelo lyaNamibia ongominista miikako yi li ine, okuza momumvo 1997 sigo 2020, ongaminista gwetanga lyegameno, gwoomina niikwankondo osho wo gwiilonga. okwa li wo a dhana onkandangala onene ethimbo lyekondjelomanguluko lyoshilongo shika, ongagumwe gomaakwatelikomeho gongundu yoSwapo okuza mo 1979 osho wo omukuluntu gwomauyelele gwongundu yoPLAN,” a ndjokonona ngaaka.
Ta ti, natango okwa li oshilyo shomutumba gopashigwana oku za mo1995 sigo 2020.
Tagwedha ko kutya iilonga yaNghimtina oya ndhindhilikwa koyendji osho wo nkene a kondjele emanguluko lyoshilongo shika.
Omupresidente kwa li gwoshilongo Hifikepunye Pohamba okwa ti, Nghimtima okwa li ha uvu ashihe ta lombwelwa kaakomeho ye no kwa kala nokugwanitha po ayihe.
“Otandi popi sho nda longo naye, otandi ndhimbulukwa sho kwa li twa nenepaleke ondjila pokati kOkahandja noWindhoek okuyanda iiponga, okugwanitha po iilonga ke vulike komuntu,” ta popi ngaaka.
Amushangandjayi gongundu yoSwapo Sophia Shaningwa okwa dhimbulukwa Nghimtina onga kwa li omuntu gwaantu, kee na katango nokwa kala a dhama moSwapo noku yi longela uuwanawa.
“Otatu popi ependa, tatu popi Nghimtina omulumentu ngoka a kala ta kondjele oshilongo shika sigo esiku lye lyahugunina. Okwa kala nokuiyambela oshilongo shika, opo shi manguluke,’’ ta ti ngaaka.
Omukuluntu gwetanga lyegameno kwa li Sebastian Ndeitunga, okwa ti Hawala okwa thigi ko ondjokonona yiilonga yuupendafule ndjoka itaayi dhimbiwa nande.
“Ethimbo lye a longela oshilongo shika olya ulike ohole e na naNamibia. Otatu mu dhimbulukwa sigo aluhe tse itatu mu dhimbwa nando,” ta ti ngaaka.
Omukukadhi gweEster Ndatala Nghidimbwa mondjokonona ye okwa ti ina kanitha ashike omusamane gwe ihe okwa kanitha kuume ke osho wo omukwathi gwe.
“Omusamane gwandje okwa li e na eitaalo lya kola, okwa kala e na oshisho nohole nezimo lye, onkalo ye ombwaanawa oya kala ye tu kwatakanitha kumwe noku tu longa nkene tu na okwiihumbata monkalamwenyo,” ta ti ngaaka. Oyana oya dhimbulukwa he ongomulumentu gomatumbulo omafupi ihe ayihe ohe yi gwanitha po.
“Okwe tu putudhila omikalo, nonando ka li he tu dhenge komalutu, ngele twe mu tala koshipala she, otushi shi nale kutya ope na sha shimwe kaashi li mondjila,” ta popi ngaaka.
Omuprima omukulu gwoshilongo ngoka oye omunashipundi gwoSam Nujoma Foundation, Nahas Angula, okwa ti, Nghimtina okwa li wo oshilyo shoSam Nujoma Foundation. “Otandi gandja omahekeleko peha lyoSam Nujoma Foundation.
Nghimtina okwa kala nokuyambidhidha pamikalo adhihe, onkene otwa kanitha ependa,” ta popi ngaaka.
Angula okwa ti, oku mu shi ongependafulo ndyoka lya yambidhidha noku kondjela uuwanawa woshilongo shika.
Ngoloneya kwa li gwaHangwena Billy Mwaningange, okwa ti Nghimtina okwa kala kuume ke okuza omanga aanyasha.
“Omulumentu nguka ondi shi oku mu hokolola oshoka ekwatathano lyetu naye olya kala lya pama sigo twa yi kombanda,” ta hokolola ngaaka.
Ta ti, sho ya yi kombanda momumvo 1974, oya li ya ndhindhilikwa ongaanyasha ye na ondjungu noya li ya dheulwa mbala ya ninge aakwiita.
Mwaningange ta ti, kuume ke okwa li a yelwaayelwa e ta ningwa omukuluntu gwomakwatathano koLubango.