Auleria Wakudumo 

Ovahongwa kofikola yedina Ismael Kamati Tjimuhiva Combined moshitukulwa shaMusati ova shunifwa komaumbo ongula yEtivali molwaashi pofikola pe na omhumbwe yomeva. 

Omukulunhu wehongo pakafimbo moshitukulwa shaMusati Justina Amupolo okwa koleka kutya ofikola oya pata manga molwomhumbwe yomeva oyo ya etwa eshi omboola yomeva pofikola itai nane nokufikifa omeva kopomba. 

Amupolo okwa shivifila Kundana  kutya ofikola oyi na eemboola domeva nhatu. Imwe ohai longo kolusheno omanga mbali hadi longo kosola. “Eepomba dokolusheno oda teka noda pumbwa oukokotenga vape ovo hava kala pokati koitenda osho yo oshitenda osho hashi pombo omeva okuya keepomba,” Amupolo ta holola ngaho. 

Omukulunhu wehongo okwa holola yo kutya opomba oyo hai twala omeva komuhandjo wovahongwa, komaumbo ovahongi osho yo kepata nayo oya lika po nokupya po filufilu. 

Amupolo okwa twikila ta ti omboola oyo hai longo kolusheno itai dulu vati oku va kwafa mopaife molwaashi ihai mono eenghono detango da wana okupomba omeva molwoilemo oyo ye lihanena eulu pefimbo eli lodula. 

Nande pe na oupyakadi wa tya ngaha, Amupolo okwa holola kutya ova lopota oshinima eshi noveli nale metifa lokulanda oipumbiwa aishe oyo ya pumbwa moshivike omu. 

Ofikola oya kala vati hai pewa omeva efiku keshe okukwafela opomba yomeva osola oo taa ende kashona molwa oilemo. 

Omhumbwe yomeva pofikola oya hovela vati oivike ya dja ko. Ofikola oya kala tai ningi onghendabala opo i fitike nokupangela opo pa teka ashike shipanga okwa nyenga nangolo fiyo osheshi va kufa etokolo lokupata omeva filu filu nokutuma ovanafikola keumbo. 

Oshikondo shehongo moshitukulwa shaMusati osha holola kutya ova teelela eemboola di kale da pangelwa moule womukokomoko woshivike eshi. Ovahongwa novahongi navo ova teelelwa va kale va shuna kofikola oshivike tashi ya ngeenge omeva a hovele okuenda. 

Omukulunhufikola Linus Fillippus okwa holola momukanda wa monika kuKundana omo ta shiivifile ovadali novatekuli vounona kutya ofikola otai tumu ovahongwa keumbo molwa onghalo youndjolowele oyo ya etwa 

“Omhumbwe yomeva oya ya ehongo moshipala onghene otuna ashike okutuma ounona keumbo. Ohandi indile ovadali opo va ile ko ounona vavo kofikola meendelelo,” Omukulunhufikola ta ti ngaho. 

Oshikondo shehongo moshitukulwa shaMusati osha ti osha kwatafana nomahangano a pumbiwa opo omhumbwe ei i kandulwepo meendelelo. 

“Ohatu pandula ovakwashiwana vomomudingonoko Omakange, ovadali novahongwa eshi va kala ve lididimika nokuuda ko omhumbwe ei oule woivike aishe oyo ofikola ya kala i na oudjuu ou,” Fillippus ta ti. 

Eameno, oukolele nonghalonawa yovanafikola oyo fimba ina ongodi mehongo, onghene etokolo eli ola ningwa okuamena ovahongwa. 

-awakudumo@nepc.com.na