Auleria Wakudumo
Mounyuni woinima yOshiwambo ta i ende tai xulu po molwexumokomesho, natango vamwe otava kondjifa okukaleka po omufyuululwakalo nomikalo dOshiwambo moshilongo.
Martin Angula, omulumenhu weedula 30 oye umwe vomuvanini ovo natango tava kaleke po oikwatelwa yOs h iwambo moNamibia.
Angula odalele yomomukunda Uuhahe moshitukulwa shaHangwena . Okwa hovela okuhonga oikwatelwa yOshiwambo mo2016 omanga a ninga omunahambo kohambo yaxe momukunda Okayoka moshikandjohoololo shaNehale Lya Mpingana moshitukulwa shaShikoto eshi a dopa ondodo onhi-12.
Oha hongo nokunduluka omaholo, omatemba okulila, eenguto neefoloko doiti, eedibo, eemhindo da hongwa moiti, oulwiyo naikwao ihapu.
Monena, eefitola odi yadi oikwatelwa oyo ya longwa meenailona osho yo ikwao oyo ya longwa komashina. Nonande i na ombilixa, oikwatelwa ei itai yelekwa naayo ya longifwa mounyuni wahautolonde.
Angula okwa itavela kutya oikwatelwa yOshiwambo oya yooloka kwaai yoshinanena. Okwa ti ihai kakeke onghalo yomhepo mokuinduluka ha ngaashi oikwatelwa yeenailona nohai kala po nohai fewa paushitwe.
Nonande te shi endifa nawa, ondjila yaAngula oya kala i na omainda ahapu. Angula okwa li a ponokelwa nokuvakwa oinima yaye aishe mwa kwatelwa omashina oo kwali hae mu kwafele ponhele yaye yokunduluka mo2021.
Eshi osha fiya Angula a dengwa pomutima nai ashike inashi mu teya omukumo.
“Onde litwa omukumo kutya onda tamekele ndihe na sha nohandi dulu okutotolola ashike natango, “ta holola ngaho.
Angula okwa kala a twala oihongomwa yaye keenhele domaulikilo oipindi ngaashi mOngwediva, Okongo, Eenhana, Otjiwarongo noSwakopmund.
Molwounongo weenyala daye, okwa pondola okumona elihongo la wedwa po koCOSDEF osho yo koproyeka Oyetu. Eshi oshe mu kwatela okuyambula po ongeshefa yaye.
Angula okwa ninga yo omunelao eshi a mona omhito yokufutilwa kepangelo opo eli honge oprogramma hai ifanwa
kutya ounyuni eshi tau ende nokulunduluka, noikwafifo otai ende tai ningi ihapu.
Hangula ota indile epangelo, ovanangeshefa novanasamaria ovanamutimanghenda opo vemu kwafe a lande omashina okukweya nokulonga oilonga imwe opo a dule okunduluka oikwatelwa ihapu poshikando.
“Ohandi indile ekwafo lokashina kokuteta omiti, okashina kokukweya oiti nomashina makwao ooh aa longifwa mokunduluka oikwatelwa yopamufyuululwakalo opo ndi kale handi landifa keenhele da kula ngaashi keehotela nokeemusiuma,” Angula ta indile moshiwana.
Ngeenge okwa kala ena omashina aa, otashi mu kwafa opo a wedele ongeshefa yaye, a yandje oilonga kovanyasha vakwao nokuyambula po oindulukomwa moshilongo.
Angula okwa ti ohokwe yaye yokuhonga oikwatelwa yoshiwambo kaishi ashike molwa oshimaliwa ndele okutwa ovanyanyamaulu omukumo nokudimbulukifa ovanhu opo va fimaneke oinima yoshiwambo.
Angula ota ulike kutya nonande ounyuni wa kwatwakokoshinanena, oinima yopamufyuululwakalo natango otai dulu okundulukwa nokuya komesho.
Angula otai indile yo oshiwana opo shi alukile kokulongifa oikwatelwa yopamufyuululwakalo ngaashi ovo ve tu tetekela va kala have shi ningi.
-awakudumo@nepc.com.na