Auleria Wakudumo
Omutengenekwafaneko womudo 2026/2027 owa shuna pedu nobiliona N$1,3 okuyelekanifa nomutengenekwafaneko womudo 2025/2026.
Minista wemona Ericah Shafudah okwa holola omutengenekwafaneko woshimaliwa shomudo 2026/2027 shi fike peebiliona N$105. Omudo wo2025/2026, minista okwa li a shivifa omutengenekwafaneko woshimaliwa shi fike peebiliona N$106,3.
Oshimaliwa eshi sha tukulilwa eeministeli depangelo da yooloka noshi fike peebiliona N$87,9.
Ngaashi omutengenekwafaneko womudo wa ya, epangelo ola tula eeministeli odo di li fimba i na ongodi moshiwana komesho mokumona oshimaliwa shihapu.
Eeministeli edi ongaashi ouministeli wehongo, ouhaku, ouministeli woshimaliwa, etanga leameno nadikwao da wedwa po.
Ouministeli wehongo, oungoba, omaudano novanyasha oo wa mona oshimaliwa shopombada. Ouministeli owa wedelwa oshimaliwa shi fike peebiliona N$28. Omutengenekwafaneko womudo wa ya, ehongo olali la pewa oshimaliwa shi fike peebiliona N$24,8. Eshi otashi holola kutya ouministeli owa wedelwa neebiliona N$3,2.
Oshimaliwa eshi otashi ka kwatela mo ofuto yoshali yovalihongi koiputudilo yopombada, eambidido lovanyasha neyambule po nexumokomesho lomaudano moshilongo.
Omukulunhu woUnam moHifikepunye Pohamba Jacob Sheehama okwa holola kutya epangelo ola ninga nawa eshi la yandja oshimaliwa sha kola keeministeli odo dina oikondo ihapu ngaashi ehongo.
“Nande ongaho, otu shi shi kutya omunwe umwe ihau litoola onha,” Sheehama ta holola ngaho.
Sheehama okwa holola kutya natango ota indile oshiwana, oohandimwe, ovanangeshefa nomahangano opaumwene opo a kwafe epangelo opo eemhumbwe adishe dehongo di kandulwe po.
Omanga, ouminsteli wouhau nonghalonawa wa mona oshimaliwa shi fike peebiliona N$13,1. Ouhaku owa li wa mona nale momutengenekwafaneko wa ya oshimaliwa shi fike peebiliona N$12,3.
Eshi osha hala kutya ouministeli wouhaku nao owa wedelwa neemiliona N$800.
Sheehama okwa ti oshikondo shouhaku osha pumbwa natango oshimaliwa sha wedwa po shaashi eshi sha yandjwa inashi wana.
“Epangelo ola katuka onghatu iwa okukwashilipaleka kutya ola hanauna po omilandu dovakolonyeki mouhaku ngaashi omukalo waavo vena oshimaliwa tava pangwa paumwene omanga ovo vehenasha tava pangwa papangelo,” ta holola ngaho.
Okwa ti oshimaliwa osha kola shili ashike natango inashi wana.
David Alfeus, umwe womovanailonga vepangelo okwa holola kutya epangelo olali lina okuyandja oshimaliwa shi fike pamwe kouministeli wehongo oshoyo ouministeli wouhaku.
“Sha landula eshi twa shiivifilwa kutya ovanailonga vepangelo otava ka kala hava pangwa koipangelo yepangelo okudja mulotete laApilili, oda li da teelela minista woshimaliwa a yandje oshimaliwa sha Konda nokuli peebiliona N$30,” ta holola ngaho.
Alfeus okwa ti oku wete ouhaaku wa pumbwa ovanailonga vahapu natango, omiti noikwapangifo yaw ana, okutunga oipangelo ipe oshoyo okuwedela oyo ili po nale.
Ngeenge owa hala vahapu va longifa oipangelo yepangelo, nena otwa pumbwa okulundulula onghalo yoipangelo yetu okudja kepangelo fiyo okoikondo yopaumwene.
Eeministeli dikwao odo da pewa oshimaliwa shopombada ongaashi, ouministeli woshimaliwa owa pewa oshimaliwa shi fike peebiliona N$12,9, ouministeli wetanga leameno owa pewa eebiliona N$7,5 omanga ouministeli woikwameni neameno lokeengaba wa pewa eebiliona N$8,1.
-awakudumo@nepc.com.na