Auleria Wakudumo 

Minista womayambulepo eedoolopa nomikunda James Sankwasa okwa holola kutya ookansela otava ka kala tava yandje olopota yoilonga yavo yomafiku 100 mombelewa. 

Sankwasa eshi okwe shi holola koshoongalele osho sha li ko pokati kovaleli voitukulwa novaleli vomeedoolopa Omaandaxa kOtjiwarongo. 

“Ookansela voitukulwa osho yo veedoolopa otava ka teelelwa va yandje olopota yoilonga yavo omafiku 100 mombelewa ngaashi shi li hashi ningwa okudja kombelewa yOmupresidente, keeminista fiyo okoongoloneya voitukulwa,” minista ta holola ngaho. Moule womafiku 100, ookansela ova teelelwa va holole pamushangwa wolopota osho va longa. 

Sankwasa okwa ti eshi osho shina okuningwa ku keshe umwe, naye mwene eli kwatela mo shaashi ova udanekela okulela oshiwana shaNamibia. 

“Natu ulikileni oshiwana shaNamibia kutya oshe tu hoololela shike,” ta ti ngaho. 

Minista okwa ti oomayola veedoolopa, ookansela, ovanashipundi otava ka lopota omafiku avo oilonga 100 kovakulunhuwiliki. Eshi otashi ningwa opo ku kwashilipalekwe kutya ova wanifa po oilonga yavo nokuyandja omayakulo moshiwana. 

Sankwasa okwa ti ombelewa yaye otai ka shaina omangela tai ulike nghene ookansela, oomayola oshoyo ovakulunhuwiliki veedoolopa tava wanifa po oilonga yavo mombelewa. 

Minista okwa holola yo kutya ouministeli waye owa nduluka po nale eeveta nomalandulafano nghene ookansela vena okulihumbata moilonga. Okwa ti omulandu ou oo nau wilike ookansela moilonga opo ku kwashilipalekwe kutya ova longa moshili nomouyuuki, tave shi ningi pakulihumbata pambelewa peendodo adishe doitukulwa osho yo eedoolopa. 

Minista okwa holola kutya nghene a pewa oshipundi shouministeli, okwa didilika ookansela vamwe vati ve wete vena eenghono opamwe novakulunhuwiliki vavo okuninga omatokolo okupitika omalweendo. 

Okwa ti oshinima eshi ota shi talwa nawa kouministeli waye notau ka kwashilipaleka kutya itau ka fiya emanya la londa kulikwao. 

Minista okwa kunghilila ookansela opo va lalakanene okuyandja omayakulo ongushu koshiwana, okuyandja oilonga nokuyambula po exumokomesho moitukulwa nomoikandjohoololo yavo. 

Natango ohandi mu takele omunwe opo mu xulife po oulingilingi wopapolitika. Okwa ti oulingilingi wopapolitika ohau tula eemhumbwe dopapilitika yonhumba komesho ponhele yokutula komesho eemhumbwe doshiwana. 

-awakudumo@nepc.com.na