OMUGULUGOMBASHE – Ovakwashiwana vomomukunda Omugulugombushe moshitukulwa shaMusati ota va pula epangelo opo li tunge endiki momukunda wavo lokukala ovanambelewa hava longo noifitukuti opo va dule okuamenwa keendjaba molwashi paife ova kwatwa koumbada wokudipawa keendjaba.
“Otwa pumbwa ovanambelewa efimbo keshe tava longele momukunda wetu shaashi paife otwa ninga oihakanwa yokudipawa keendjaba. Ounona vetu ngeenge tava di keefikola ove na omhito yokuponokelwa keendjaba,” umwe womukalimo ta ti.
Oshivike sha dja ko okwa lopotwa omukainhu weedula 46 a xulifa eshi a dipawa kondjaba efimbo longula komukunda Omugulugombashe. Nakufya okwa tongolwa oye Klaudia Mwaala omukalimo womomukunda tuu omo.
Okwa fiya po ounona vaye vane osho yo omushamane waye. Otaku hokololwa kutya omukainhu ou okwa li e li navakwao pefimbo olo kwa li tava taata ondjaba i li momukunda wavo. Pefimbo Kundana a talela po eumbo oku ha kudi omukainhu ou a dipawa kondjaba, Johannes Paulus ou kwa li ve li nanakufya pefimbo tava taata ondjaba okwa hokolola ta ti oshiningwanima eshi oshevatilifa.
“Okwa li atu taata ondjaba molwashi okwa li twa hala okulifaneka omafano tuli pondjaba,” ta ti. Paulus okwa hokololwa ta ti okwa li ve li mongudu yovanhu vahetatu.
Okwa ti nakufya Klaudia tete okwa nukila ondjaba nomushila ndele tai tanauka ndele ta faduka po. “Okudja opo natango otwa landula ondjaba ashike okwa li ya hanya shaashi okwa li hatu i kupula noiti,” ta ti. Okwa hokolola ta ti konima yokafimbo okwa ka dja umwe womukwashiwana ndele ta yashe ondjaba komaulu. “Ondjaba oye li denge po. Klaudia okwa li eshi ngeenge ondjaba oya fya. Okwa ya pondjaba ndele tei kwa ta komutwe ta ti kutya natu mu faneke,” ta ti.
Paulus okwa hokolola ta ti ondjaba mboli ina i fya, oya tanauka ndele tai lyaminine po Klaudia. “Okwa tuwa nomayowo ndele ta lyatwa kondjaba. Okwa li a topa omandjandja fiyo ta xulifa,” ta ti. Okwa weda po ta ti okwa endelela ndele ta lopotele opolifi. “Ovanambelewa va dja kouministeli womidingonoko okwa li va fika ndele tava dipaa ondjaba,” ta ti. Efiku olo londjaba ya dipawa oshiwana oshe li topolela ombelela. Ovakwashiwana ovanyenyeta tava ti ovambelewa vouministeli womidingonoko ohava di kokule naashi oshi li eshongo linene shaashi ngeenge tava denge eengodi ovanambelewa ohava fiki kwalata.
Salti Mwaala, ou eli omumwainakadona wanakufya okwa hokolola ta ti omapya avo okwa ninga oihakanwa yokuhanaunwa po keendjaba. “Unene tuu pefimbo eli lodula momapya muna oikunonwa eendjaba oda ninga dihapu. Otu li moudjuu shaashi otwa kondekwa keendjaba,” ta ti.
Eshi a kwatafana naKundana omupopiliko womuministeli womidingonoko, Vilho Hangula okwa yelifa ta ti moshitukulwa shaMusati omu na ombelewa i li koRuacana ina ovanambelewa va wana okuyakula oshiwana ngeenge tashi lopota eendjaba di li komikunda davo. Okwa ti efimbo keshe shiwana oha shi lombwelwa opo shi kale kokule neendjaba shaashi oda nyika oshiponga.
“Oshiwana ina shi pumbwa okushikula eendjaba ile okudenga eendjaba. Ondjaba oya nyika oshiponga ngeenge ya shindwa,”ta ti.
Hangula okwa ti oshiwana na shi longele kumwe okuamena oifitukuti ili momidingonoko davo.
Okwa ti ovanambelwa ove li longekida efimbo keshe okukala va fika koshiwana ngeenge sha lopota eendjaba di li komikunda davo. Festus Iipinge ou e li omushamane wanakufya okwa hokolola ta ti ina hangika po pomukunda pefimbo loshiningwanima shefyo lomukulukadi waye.
“Onda hangika nda dja po noilonga. Onda dengelwa ongodi kutya omukulukadi wange okwa dipawa kondjaba,” ta ti.
Okwa hokolola ta ti omukulukadi waye okwa li omunambili e na elandulafano noukumwe nokuhole oilonga yomepya.