Abraham Mwanyekange 

Ovakalimo vomomukunda Okakewa moshikandjohoololo Otamanzi mOmusati ova holola kutya ove li moupyakadi weedjaba tadi li po oikunomwa yavo. Omukalimo womOkakewa Martha Kasheela okwa shivifila Kundana ta ti oikunomwa yavo ihapu oya lika po keendjaba. 

“Meumbo letu kape na ou ha longo. Paife ngaha otu li moupyakadi molwaasho oikunomwa yetu ihapu oya lika po keendjaba. Nande natu ye koshikunino shoinamwenyo tu pewe nande oshimaliwa tu ka konge okakutu koufila, ihatu mono ko evatelo lasha,” Kasheela ta holola ngaho. “Ohatu indile ouministeli u ninge po sha,” Kasheela ta indile. 

Martha okwa ti odula ya dja ko omapya avo okwa li natango a hepekwa keendjaba ndele fiyo okonena eli inava mona efilonghenda lasha. 

Okwa ti nande ou dengele koshikunino shoinamwenyo shaGwasheya shUushona omo eendjaba dihapu da idililwa ihaku di evatelo lasha. 

Kasheela okwa holola yo kutya ava ve li koshikunino shoinamwenyo nande va ifana ohave ya konima yomafiku atatu ile edule po. Kapatashu womukunda Paulus Iipinge naye okwa koleka eendjaba da hapupala momukunda wavo. “Ngaashi Olomakaya oda enda po da koya 14 di na oundjabona. 

Oda hepeka po omapya avali momukunda wetu, onghelainya natango opali dili nhatu,” Iipinge ta holola. Iipinge naye okwa ti nande omapya avo okumonifwe oixuna keendjaba fiyo onena iha va mono omakwafo okudja kepangelo. Omunashipundi Gwasheya Shuushona Nelao Amadhila okwa lombwela Kundana ta ti ove na oupyakadi woyeendifo nohave likolelele kouministeli. Okwa weda po ta ti kape na omunhu iha mono ekwafo okudja kombelewa yavo shapo ongeenge ina lopota ta ti nekwafo eli hava yandje kali fi lakula ashike ohali ningwa ashike okumbilipaleka ou epya laye la ningilwa omunyonena. 

“Omilandu opo di li da yela novanhu vahapu ove shi shi nawa kutya ngeenge u na epya loye la ningilwa ominyonena keendjaba nena ou na okuninga shike,” Amadhila ta yelifa. Amadhila okwa weda po kutya omo hava yi momikunda tava ninga oihongi yomauyelele. Okwa ti keshe omukunda ouna ovakalelipo ovo have vape ouyelele,” ta yelifa vali ngaho. 

Omupopiliko wouministeli womidingonoko, omapashiono nomifitu Vilho Hangula okwa holola kutya moNamibia omu na eendjaba dihapu neenghono. Ta ti paife otu na Eendjaba da koya 2 500 oshilongo ashishe. 

Hangula okwa ti keshe ou ena apya laye la hepekwa koifitukuti ya amenwa na kwatafane nouministili opo a pewe omakwafo pefimbo. Omunambelewa omukulunhu woitukulwa yokoumbangalanhu wopokati Loveness Ndeiweda okwa holola kutya omukunda ou ouli kofindo yeendjaba. 

Ndeiweda okwa kunghilila oshiwana opo shiha shinde eendjaba molwaashi oda nyika oshiponga. 

Okwa ti oshiwana nashi lopote eendjaba meendelelo ngeenge da dumwa pomudingonoko wavo. 

-abbenghilai@gmail.com