Adolf Kaure

Aris !Āb di !gâunas, B1 kaidaob hîa ǀAeǁgams tsî ǀAnes hâra ǁaegu ra !khoeb dis geN$33.9 miljuns ǁkhāsib ai ge dī-ūnuhe.Nē !gâunas hîa ge ǂoa kurib ǀKhūǁkhâb 2025 !nâ, ǀgaisa ǀnanub xa ge !aromahese ǂkhôadīhe tsî sîsenūs !auga hâ is ge ǀoasase ge kuru-unuhe tsî ministeri, sîsengu tsî !nari!oabadi dib, Veikko Nekundib xa ǂoa ge wekheb di donertaxtsēs ai ǁkhawa sîsenūs !aroma ge ǀhui-amhe.

“Sada ǁanǂgāsaben di !norasasib ge a ǂguro tsî noxopa nî aibe ǁnâuguhe xū-i ase sada ǂhanuba ge ība tama hâ i tsî ība tide. ǁNā-amaga ta ge kai ǂnīsasib ǀkha ra mî, nē sîsenni go ǂoaǂamsasib kha a dītoahe tsî ǀoasase a sîsenūhe ǁkhā !khaisa,’ tib ge ge mî. ǀOro !gâunas ge ge khôaǁnâhe, ûikurigu âsas ge !kharu hâ i amaga tsîs ge ǀasa !gâunasa oms di sîsenna China Railway Seventh Groupsa ge māhe. Nē ǂnûiǂgās ge ǂoa ge kurib di ǀKhūǁkhâb !nâ sîsengu ǀkha ge ǁnāǂgū tsî nē kurib di ǀKhūǁkhâb !nâ ge dītoa.

ǁKhātib ge ǀasa daob hîa ǀgamǀkhākha mâ ǀkhāb hoab ai ra !khoe, ǀAeǁgams tsî ǀAnes ǁaegub tsîna N$17.91 miljuns ai ge kurutoahe.

Ministeri ge -îb di ganganxasiba Daogu ǂGaeǂguis (RA) tsî nē projeksa gere mûǂam kontrakteri tsîna ge mā, nē !amku ssenni !aroma. Daogu ǂGaeǂguis di ǀawemā!nans aiǂnû-aob, Martins Kambulub ge ge mî, ǂōrisa sîsenǁareb hîan ge ministeris sîsengu tsî !nari!oabadi dis, texnise !harib ai gere sîsen !nandi, ǂōǂōsib !nâ a ǂhâbasa dīǀgaun di !amǁares ǀkha ǁnāti ī xōǀkhā nî !nari-aihe daoga a ǀaweǂuisa, auton di sîsenūs daob dis ǂhanihe tidesa ǁawoǁawos ase. “Nē !gâunas tsî daob tsîna !nubu -ǁaeb !nâ kurutoas ge a ǁgauǁgau, ǀgaisa ǂgaeǂguisa ūhâs, ǂōrisa ǀaweǁguiba ūhâs tsî sîsenǁareb ǂhanub tsî aitsama mâbasen ǂnûiǂgādi ǁaegu hâb tsîn mâ !gâi!gâna a sī!nâ ǁkhāsa,” tib ge Kambuluba ge mî.