Omahake na Tjozondjupa turu kovitonge okuundja ondekurona yazo omuyaruke Unomasa James Uerikua, nomuzandona we Venturo, Osondaha mbu ma suvisiwa mOtjiserandu mouye wa Ngama mOkarukondua kOmatoororero ka ka Tsumkwe mOrukondua rwa Tjozondjupa. 

Ozondjira za Maheke, nu tjinene nene zOutukondua wOmatoororero wa Mataura, Epako, Okorukambe, Epukiro na Tjombinḓe, maze serurwa kutja omuna ondekurona makapitire po. 

Tjinga ovimbumba ama vitjirwa no kuuhara avyara oviyao mozondjira tjimuna imbi omuna womundu tjayarrerrerw oviyao noku ya kurwa nozohiva tja hiti mu Jerusalema, tjingetjo ozondjira inḓa maze serura oku muundjira po ndinondi pu ma tjirwa no kuuhara ama kapitira okutuurunga ozoresevate za ṱukiro. 

Oeiseba nOngama. Uerikua nomuzandona we Venturo ndinondi otji ma ve tjirwa ama vetoora ouyenda okuza mOtjomuise okuyatakana Omataura, Epako, Okorukambe, Otjozondjima, Omauezonjanda, Okovimburu, Oruvize, Ovinjuru, Okatuuo, Otjimanangombe nOmuvero wa Kaṱumba. 

Ovimbumba pu ma vi muundjire meṋe yozondjira okumupa ondjozikiro ndjemupuire noku muvirikiza imba mbehina okuvaza kOtjiserandu kOngama. 

“Matutjiti nao kutja apehasewa omundu pehi, tjinga atuhe ama tutjiwa kutja kangamwa auhe ngu ma yenene okuyenda ko Ngama,” Toucy Tjijombo, okanepo kotjikutu, waraere Lissony Njembo. 

Natja Orata yOkarukondua kOmatoororero ka Pukiro, Packy Pakarae wari notjiungura otjinene otjimbwandangoma okukondja kokutja apehe pu ma kapitira mondjira mEpukiro mahizikize okuyandjera oviwana okumupa ondjozikiro oseinina. “Menyunguhuka ra Sondoha otji 

ma tusuvisa omuseuverua wetu Unomasa James Uerikua mOtjiseranbdu mOngama mOrukondua rwa Tjozondjupa,” Tjijombo matja. Uerikua nomuzandona we wozombura o-14 vatire Oritjatano romayuva womasuviro omare wokambo kondiro moumba wetemba mondjira pokati ka Tjiuarongo na Kakarara. 

Wari okanepo kOmbongarero yOtjiwaṋa kombunda tjari Ongooneya ya Tjozondjupa.